ВЕСТ НА ДЕНОТ– Спасовски: Ги отфрлам сите шпекулации за договор, сметаме дека Мијалков е се уште во државата
Министерот за внатрешни работи, Оливер Спасовски, на првата прес конференција по бегството на обвинетиот во „Таргет – Тврдина“ Сашо Мијалков, ја објави хронологијата на дејствијата на МВР и ЈО пред, и по бегството.
-Дозволете ми пред сè да ги отфрлам сите шпекулации за било какви договори и со било кого. МВР ги презеде сите расположливи мерки за обезбедувањето на лицето и активно работи на пронаоѓањето и негово приведување пред лицето на правдата.“, истакна министерот Спасовски .
Министерството за внатрешни работи, на својата веб страница во делот на потраги, ажурираше објавената потерница по поранешниот директор на УБК Сашо Мијалков, од национална во меѓународна потерница.
На новинарско прашање дали се сомнева дека има „кртови“ во министерството, Спасовски изјави дека се сомнева во „кртови“ во целиот систем, во сите институции. Спасовски изјави дека проверуваат и меѓу своите редови, и дека тоа треба да се прави во сите институции на системот, и дека имаат сознанија дека Мијалков е се уште во државата.
ИЗЈАВА НА ДЕНОТ– Шекеринска: Жалам што на некои партиската значка им е поважна од државната
Министерката за одбрана Радмила Шекеринска денеска одговарајќи на новинарско прашање на ЦИВИЛ Медиа за постапките на полковникот Драган Ковачки изрази жалење што, како што рече, праксата на рушење на институцијата која му дава плата и натаму продолжува. Меѓутоа, нагласи таа, нека им е на чест на сите оние на кои партиската значка им е поважна од државната значка.
-Да сте македонски државјанин и да ги слушате овие зборови на американските колеги и сојузници и задоволството од соработката со нашата Армија и одбрана и после тоа да ги чуете коментарите од еден за жал офицер на истата таа армија, ќе мислете дека станува збор за две различни земји, две различни армии и два различни одбранбени система. Знам дека најголемиот дел знаат на кого повеќе ќе му веруваат, изјави Шекеринска, која заедно со амбасадорката на САД, Кејт Брнз го посетија армискиот полигон „Криволак“ каде беа информирани за претстојните активности за реализација на вежбата „Одлучен удар – 21“.
ФЛЕШ ВЕСТИ
Правда – Во Основниот кривичен суд денеска се објавуваат пресудите за обвинетите во случајот „Монструм“.
Доживотен затвор добија Алил Демири и браќата Агим и Африм Исмаиловиќ, обвинети за тероризам, додека обвинетиот Хаки Азири се осудува на казна затвор од 9 години, а Фејзи Азири е осуден на казна затвор од 15 години.
Одбраната најави жалби по пресудата и по мерките притвор, и порача дека се убедени дека на крај ќе докажат дека обвинетите не се сторители на овој, како што рекоа, грозоморен чин.
Попис – Објавен конкурс за попишувачи и реонски инструктори за Пописот 2021
Образование – Регионалниот фонд за предизвици, на денешната Национална конференција го претстави првиот повик за поддршка на инвестиции во учење преку работа и дуален модел на образование, во износ од 150.000 до 600.000 евра.
МОН ги повикува средните стручни училишта и компаниите да се пријават за грантови на Германската развојна банка
Антикорупција – Националната стратегија на ДКСК за спречување корупција и судир на интереси усвоена на собраниска комисија
СЛОБОДНА ЗОНА
„Како омилен соопштувач на болни вистини, со сиот ризик од спружување од дежурните плукачи, Младиќот би сакал директно од Кристалната топка да ви ги пренесе впечатоците за прашањето што ве мачи и ќе ве мачи со денови и недели – кој е крив за бегството на Мијалков? Да одиме со ред.“, пишува Петрит Сарачини во колумната „Кој е крив за бегството на Мијалков?“
„Неговото бегство, пак, е посреден доказ дека нешто во македонскиот правен систем мора да се сменило „од неговото време“, бидејќи се уплашил, па побегнал, во очи на долгогодишната затворска казна што очекува(ше) во петок да му биде пресудена… Или посреден доказ дека во македонскиот правен систем ништо не се променило, штом и нему му успева да ја „кидне“ пред судот да му ја испорача правдата.“, пишува Сашо Орданоски во колумната „Долга е сенката на Мијалков“
„Колку државата треба да потроши на училишта? Дали да се изгради нов аеродром? Дали владата треба да обезбеди доделување на станови? Дали треба да се намалат загадувачките емисии? Сите овие се примери на колективно донесување одлуки, за кои обично се потпираме на креаторите на политики за да направат избори во наше име.“, пишува Сафит Зеќири во колумната „Од економска теорија до избор на добра политика“
„Разбирливо е да се побараат одговори, па и одговорност и од премиерот за уште едно бегство на осуденик од највисок ранг. Да не ги споменувам уште пет-шесте други бегства на помалите началници и нивните солдати сега расеани низ Европа. Разбирливо е да се насочи вниманието и кон министерот за внатрешни и да се побараат одговори и одговорност. Еве, да прифатиме дека е разбирливо да ги обвинат и активистите за човекови права затоа што се бореле против криминалниот режим на Груевски. И јас ќе бидам крив, не е проблем. Но никако не можам да разберам како тоа никому не му текна да го впери прстот онаму каде што е моќта да се одлучува за ограничувањето на движењето на еден ваков профил како Мијалков.“, пишува Џабир Дерала во Рафалот “Бегството на Мијалков и неодговорените прашања“
„Во прес конференцијата која се одржа минатата недела пред МВР (Министерството за Внатрешни Работи), платформата побара со рок до 8-ми март да има „кривичен прогон на сторителите од случајот „Јавна соба“ и за полнолетните жртви на случајот, а не само за делото „производство и дистрибуција на детска порнографија”.“ Односно платформата побара темелно разрешување на случајот „Јавна Соба“ и кривични пријави врз основа на „злоупотреба на лични податоци, посредување во вршење проституција, загрозување на безбедноста или ширење расистички и ксенофобичен материјал по пат на компјутерски систем во зависност од околностите на случајот“, пишува Елена Гаговска во колумната „Полицајците не се маргинализирано малцинство“
Д. Тахири