ВЕСТ НА ДЕНОТ: Стејт Департмент: Расте бројот на независни медиуми, Владата гарантира слобода на изразување
Извештајот на Стејт Департментот за Северна Македонија забележува напредок во неколку полиња, поврзани со слободата на изразување и критичко мислење.
„Бројот на независни медиуми, кои изразуваат различни ставови без очигледно ограничување, продолжи да се зголемува“ – наведува Стејт Депарментот. Тие ја нотираат и слободата на интернет.
„Владата не го ограничи или наруши пристапот до интернет и не ги цензурира интернет содржините. Немаше извештаи дека владата ги следеше приватните комуникации преку интернет без соодветно правно овластување“- се вели во извештајот.
Во него посебно се издвојува Колективниот договор потпишан помеѓу Независниот синдикат на медиумите со државната новинска агенција МИА, преку кој се гарантира 36 часовна работна недела, платена прекувремена работа, заштита од произволно отпуштање од работа и загарантирана слобода на изразување. На крајот, покрај другите нотирани слободи, извештајот заклучува дека немало ограничувања од страна на владата за академската слобода и културните настани.
ИЗЈАВА НА ДЕНОТ
„Пописот е дефиниран и се нарекува статистичка операција, за жал, во Република Северна Македонија на некои субјекти не им изгледаше така. Во последно време бевме сведоци на интензивни кампањи. Додека дел од граѓанските организации и ние како власт се обидувавме да ја разбиеме таа магла дека пописот ќе биде политизиран, дел од опозициските партии, најмногу ВМРО-ДПМНЕ, се обидуваше тоа да го претстави како политички договор. Веднаш ќе нагласам дека нема никаков политички договор во делот на спроведувањето на пописот“, изјави Славјанка Петровска, пратеничка во Собранието и член на СДСМ, на панел-дискусијата на ЦИВИЛ: „Попис: Статистика, не политика“.
ЦИВИЛНИ АКТИВНОСТИ
По договорот меѓу премиерот и лидер на СДСМ, Зоран Заев и лидерот на ВМРО-ДПМНЕ, Христијан Мицкоски, пописот да се одложи за септември, граѓаните се во очекување на потврда на овој договор во законодавниот дом на Северна Македонија. Одложениот попис е тема на ова издание на политичкиот видео магазин СКЕН.
ЦИВИЛ ќе одржи уште два бесплатни вебинари за граѓанско новинарство и медиумска писменост на 2 и 3 април (петок и сабота) со почеток во 13 часот. Вебинарите ќе траат до 16:30 часот. За учество на вебинарот, потребно е да се пополни онлајн АПЛИКАЦИЈА ЗА УЧЕСТВО.
Можност за учество имаат сите заинтересирани што сакаат да стекнат нови информации и вештини од областа на новинарството, медиумската писменост и начините на кои можат да се вклучат во работата на ЦИВИЛ.
За учесниците на вебинарите ќе има електронски Сертификати за учество. Тие добиваат и можност да се вклучат во проектите, иницијативите и активностите на ЦИВИЛ, како и во други организации и иницијативи на граѓанското општество.
Основи на новинарското известување, етика, лажни вести, хибридни закани и мониторинг на изборите и политичките процеси се дел од темите на вебинарот. АПЛИКАЦИЈА ЗА УЧЕСТВО
ФЛЕШ ВЕСТИ
ИМУНИЗАЦИЈА Почна вакцинацијата на постарите граѓани од онаа критична категорија според Националната стратегија за вакцинација. Вакцинацијата почна во најголем број од градовите, а во останатите, односно во помалите градови во здравствените домови ќе започне во петок. Нашите информации се дека досега целокупниот процес се одвива добро. Нема некакви проблеми. Јасно се одбележани местата каде е пријавата, каде се пополнуваат документите, изјави денеска министерот за здравство Венко Филипче по посетата на вакциналниот пункт во поликлиниката „Јане Сандански“, каде се одвива вакцинацијата на граѓани над 77-години.
ДРЖАВЈАНСТВО Премиерот Зоран Заев, денеска заедно со неколкумина министри се сретна со координаторот на пратеничката група на Алијанса на Албанците и Алтернатива Скендер Реџепи во врска со законот за државјанство, којшто беше причина за блокада на Парламентот. По средбата Заев изјави дека верува дека ќе се изнајде решение за проблемот со немањето државјанства и дека на средбата биле изнесени низа ставови како од страна на владините претставници така и од пратениците на Алијанса на Албанците. Следната средба е најавена најдоцна за една недела.
ДКСК во 2020 година во однос на одлучување и постапување по пријави од областа на судирот на интереси и на корупција има добиено помалку пријави за околу 50 отсто во однос на 2019 година, но донела одлуки по речиси двојно повеќе предмети.
ПРОЕКТ Република Северна Македонија ќе биде дел од проектот за изградба на терминал за течен природен гас на 17 километир од Александруполи за складирање и гасификација на течниот природен гас со капацитет од над 5,5 милијарди кубни метри, изјави денеска на прес-конференција премиерот Зоран Заев, по повод потпишување на меморандумите за реализација на проектите за терминал на течен природен гас, обезбедување капацитет за природен гас и гасната централа Александруполи.
ДИПЛОМАТИЈА „Ако нема придвижување во пристапниот процес ќе биде многу тешко Европската Унија да го зачува кредибилитетот во регионот на Западен Балкан после толку многу одложувања“, изјави денеска во Љубљана вицепремиерот за европски прашања, Никола Димитров, на заедничката прес-конференција со шефот на словенечката дипломатија Анже Логар.
ДЕМАНТ Кабинетот на вицепремиерот задолжен за борба против корупцијата и криминалот, Љупчо Николовски, доцна синоќа објави соопштение во кое најостро реагира на лажните написи на интернет порталот „Лидер“ со наслов „ПОЛИТИКА, ПАРИ, ШВЕРЦ: Зелената куќа во Крива Паланка од која се раководи шверцот на тутун“ со кои, како што се вели во демантот, пропагандни структури се обидуваат да ја компромитираат и да ја попречат борбата против корупцијата. Текстот е објавен и во други интернет портали од истата групација.
ОДБЕЛЕЖУВАЊЕ Иницијативата за заштита и унапредување на правата на трансродовите лица во Северна Македонија – ТрансФорма и оваа година го одбележува 31 Март – Меѓународниот ден на видливоста на трансродовите луѓе. Мотото на овогодишната кампања е „И родовиот идентитет е важен“ и има за цел да ја поттикне јавната свест за прифаќање на различнстите и да испрати порака дека трансродовата заедница има право на достоинствен живот и рамноправност.
МУЛТИКУЛТУРА
„Различни по нивната етничка, родова, религиозна определба, сепак со исти пораки за „слобода“, љубов“, „мир“, „почитување“, „еднаквост“, и дека „сите се исти“… беа само дел од пораките кои стотина деца ги упатија на работилниците и јавните настани, во повеќе општини во земјата, „Заедно за иста цел“, дел од проектот „Заедниците против насилниот екстремизам“ во 2019 година.
Децата преку бои, симболи, пораки и црежи покажаа како тие придонесуваат кон мирот, слободата, другарството, ненасилството, односно испратија порака дека и покрај тоа што се различни, сепак, сите се исти и имаат исти права“, пишува Дехран Муратов во текстот насловен „Различни, но со иста порака за мир, еднаквост, слобода и почитување на различностите“.
„Голем дел од предрасудите кај учениците, се всушност карактеристики кои тие дома ги научиле од своите родители. Во сржта на човекот е да стои понастрана од непознатото, па затоа многу често ваквите карактеристики и облици се пренесуваат од генерација на генерација.
Мултикултурното образование е едно од најпопуларните концепти во денешното образование. И покрај растечката литература, значењето и импликациите на мултикултурното образование се слабо разбрани. Приодите кон мултикултурното образование значително се разликуваат. Главната цел на мултикултурното образование е да ги реформира сите образовни институции и училишта, така што учениците од различна етничка, расна, културна и социоекономско потекло имаат еднакви можности за образование и учење. Друга цел на мултикултурното образование е да се подобри квалитетот и образовната мобилност кај жените и мажите. Со други зборови, еднаквоста, без оглед на студентското потекло, е главната градба на мултикултурната филозофија на образованието. Ова е филозофијата што може да ги намали постојните етнички, културни и социоекономски диспаритети меѓу учениците и нивните влијанија во однесувањето“, пишува Ирена Крџиќ во текстот насловен „Мултикултурното образование е најпопуларен концепт во светот“.
Д. Муратов
