пишува: ЏАБИР ДЕРАЛА
Денеска би сакал да споделам неколку кратки размислувања и да документирам неколку објави на Фејсбук и Твитер за кои мислам дека добро ја отсликуваат состојбата во дел од јавните комуникации.
Поттикнат од гадостите што ги пишуваат троловите и онлајн милитантите на партиите со криминално минато и сегашност, како и оние што се понесени од хистеријата слична на таа што ја предизвикуваат рамноземците, антиваксерите и КјуАнон-овците, напишав:
Ние имаме читатели, не ботови.
Нашите лајкови се од слободни луѓе, не од робови.
Искрено, не очекував толку многу позитивни реакции, особено на Фејсбук, но секако очекував да бидам нападнат од „базата“ на анонимни насилници кои се лишени од било какво чувство на пристојност и одговорност за напишаниот збор.
И најпогрдните зборови за однесувањето на онлајн насилниците се благи. Најчесто, мојот одговор на нивното долгогодишно дивеење и онлајн линчот против прогресивните луѓе не ги преминува границите на пристојноста. Воедно, јас навистина немам потреба да се занимавам со нив, бидејќи мојата работа се нивните газди, а не милитантите и оние што од себе прават будали во јавниот простор.
Ако сакате да видите кои се робови, а кои се слободни луѓе, гледајте како коментираат. Пропагандистите, иако анонимни, повеќето знаеме кои се: ГИ ИМА НА ПАРТИСКИ СПИСОЦИ. Некои се платени, повеќето не. Сите заедно се вулгарни и полни со омраза и глупост. Како ли живеат со себе?
Понекогаш, многу ретко, на дивјаците во онлајн просторот им упатувам и директна порака како оваа:
Знам, вистината боли, но треба да се соочите со себе и со својот гној, за да се излечите еден сончев ден. Инаку, не ви се лутам, го газите сопственото достоинство. Ако го имате.
И навистина не можам да им се лутам. Па тоа е нивното достоинство, не моето. Јас не газам по своето достоинство, тие го прават тоа врз своето. Многу се долу во калта за да можат да дојдат до нивото кое го држат разумните, пристојните и прогресивните луѓе.
Партиската солдатеска и оние што мислат дека се „независни“, а дејствуваат во истата насока, се обични пропагандисти во корист на груевизмот (што и да подразбирате под тоа, точно е). Погледнете само еден факт:
Деновиве, Грујокоптер пак го растурија на составни делови. Сам си го бараше. Мајка му и тој приватно се возеа со хеликоптери, а ги користеа и за партиска пропаганда, но тој излажа дека никогаш не се качил на хеликоптер.
Погледнете со што се занимаваат неговите слуги на Фејсбук и Твитер деновиве, за да ви стане јасно како и зошто се поврзани и во што се состои нивната борба.
Навистина, нема зошто да се спуштаме на нивото на обични криминалци какви што се и некои претседатели или функционери на политички партии, а за нивната солдатеска и да не говорам. Трошат наши пари што ги украдоа за да ја манипулираат јавноста. Нечесно, многу нечесно!
Но… Без оглед на тоа до кои позиции ќе се доберат, газејќи преку лешеви, тие секогаш ќе останат пропаднати и гадни ликови. Толку за денеска.