Денеска официјално започнатата кампањата за Локалните избори 2021, попладнево веќе зема уште посилен замав. Промотивните видео спотови полни со ветувања ги окупираа ТВ каналите и останатите медиуми, кандидатите меѓу граѓан(к)ите се претставуваат со својата програма, соочување на кандидатите за градоначалници на општина Аеродром на ТВ, жестока дебата помеѓу кандидатите за градоначалник на Општина Шуто Оризари на првата од серијата дебати организирана од ЦИВИЛ. Црна кампања, злоуптреба на деца во политичката кампања, изјави и ветувања на ниво на парламентарни избори, тоа е констатацијата на мониторингот на ЦИВИЛ во првото издание на „Изборен рапорт“ што денеска се емитуваше во живо, во 11 часот.
ВМРО-ДПМНЕ кампањата „Создади нова иднина” ја почна традиционално од Охрид
ВМРО-ДПМНЕ и Коалицијата „Обнова за Македонија“ ја започнува изборната кампања за претстојните локални избори, традиционално од Охрид. На собирот на отворено, кај Антички театар во Охрид, претседателот на партијата, Христијан Мицкоски, ги претстави кандидатите за градоначалници на опозициската партија, вклучително и кандидатот на ВМРО-ДПМНЕ за Охрид, Кирил Пецаков, кој пред присутните ја претстави својата визија за развој на градот доколку тој ја добие довербата. Своето обраќање пред присутните на почетокот на кампањата, Мицкоски го започна со виц за Заев ( кој своевремено кружеше во јавноста , но со Груевски во главна улога), а потоа упати и неколку пораки до граѓаните:
– Ова се навидум локални избори. Но ако се погледне подлабоко, се нешто повеќе од тоа. Од нив зависат многу работи, сите поврзани со иднината на нашата Македонија.
– Да создадеме нова иднина! Ние гарантираме 14.835 проекти, кои ќе направат од Македонија успешна приказна.
Караванот „Најдоброто за мојата општина“ на СДСМ стартуваше од Битола
СДСМ ја започна кампањата „Најдоброто за мојата општина“ на средба со граѓанките и граѓаните во Демир Хисар и продолжија на голема граѓанска трибина во Битола. Од Демир Хисар, претседателот на СДСМ, Зоран Заев, пред присутните порача дека на овие избори СДСМ и коалицијата ја има најдобрата понуда на домашната политичка сцена.
Најдобрата понуда значи зелена агенда како врвен приоритет, брз, но рамномерен локален економски развој и инфраструктурни инвестиции во сите општини и региони. Заев потенцира дека граѓаните одлучуваат на 17 октомври и со гласот за коалицијата предводена од СДСМ избираат „заедништво и развој, наспроти поделби и минато“.
Од големата граѓанска трибина во Битола се обратија Мила Царовска, Љупчо Николовски, Венко Филипче, Бојан Маричиќ, Сања Лукаревска и кандидатот за градоначалник на Општина Битола, Христо Кондовски, кој пред граѓаните ја претстави својата визија за поубава Битола со нов сјај и најави бројни проекти, од кои ги претстави топ 10 проектите.
Свое обраќање во Општина Свети Николе имаше и кандидатот за градоначалник на СДСМ за оваа општина, Сашо Велковски.
Алијанса за Албанците
На првиот ден од почетокот на кампањата за локалните избори Алијансата за Албанците отвори општински изборен штаб во своето седиште во Тетово, а претседателот на партијата Зијадин Села на сите им посака добра кампања.
Движењето „Одлучно за промени“ го започна изборниот караван
Време е да престане бетонизирањето на секоја слободна површина во градовите, време е навистина да понудиме и за нас и на идните генерации, чист воздух за да останат здрави, истакна лидерката на ДОМ, Маја Морачанин, на вечерашниот митинг со кој се означи стартот на изборниот караван на движењето „Одлучно за промени“, водено од ДОМ и ЛДП.
Кампањата започна и во Скопје
И ДУИ, Шанса за Центар, кандидатите за градоначалник за Град Скопје, меѓу кои и Данела Арсовска, подржана од ВМРО-ДПМНЕ, и кандидатот на СДСМ, Петре Шилегов, од денеска фицијално започнаа со кампањите за локалните избори .
ТВ И ОНЛАЈН ДЕБАТИ И СООЧУВАЊА
ЦИВИЛ организираше дебата со кандидатите за градоначалник на Општина Шуто Оризари, Курто Дудуш од коaлицијата ЛДП-ДОМ, Асан Ферат од СДСМ и Тефик Махмут од Левица. Тие зборуваа за зелените вредности, антинационализмот и социјалната правда.
Тие си подадоа рака дека ќе водат фер и демократска кампања и дека нема да се навредуваат меѓу себе, туку дека ќе водат битка со различни прогресивни идеи и програми кои ќе им ги понудат на жителите на Шуто Оризари.
На ТВ Телма се соочија кандидатите за градоначалници на Општина Аеродром, каде дебатираа за досега оствареното и новите ветувања за развој на општината.
ЦРНА КАМПАЊА
Уште на самиот почеток на изборната кампања за локалните избори кои ќе се одржат на 17 октомври, веќе почна црната кампања во Кочани против актуелниот градоначалник и кандидат на СДСМ за оваа функција, Николчо Илијев.
Во текот на ноќта, во градот се расфрлени летоци со порака: „Зошто ме присиливте“, „Илјада пати кажав не за втор мандат!“. Според инфромациите на набљудувачи на ЦИВИЛ од теренот, летоците биле расфрлени од активисти на опозициската ВМРО-ДПМНЕ.
Политичките партии и кандидатите за градоначалници пред почетокот на изборната кампања за локалните избори потпишаа Кодекс за фер и демократски избори, кој очигледно не траеше ниту еден ден. Кампањата на терен покажа дека партиитe не се воздржуваат од црна пропаганда.
Д. Мишев
