Потпретседателот на ВМРО-ДПМНЕ, пратеникот Александар Николоски, не даде одговор на прашањето дали неговата партија ја прифаќа програмата на нивниот најнов политички сојузник, партијата Левица, коментираат во Фронтлајн.
Во одговор на прашањето, Николоски се врати назад во историјата и тврдеше дека токму СДСМ, како наследничка на Комунистичката партија од времето на југословенската федерација, била против влегување во сојузи. Тој рече дека ВМРО-ДПМНЕ е прва партија која се залагала за членство во НАТО и ЕУ.
„Ако може да завршам, бидејќи не сме на интервју, ми поставувате прашање на прес конференција“ – остро ја прекина и ја „поучи“ Николоски новинарката која се обиде да му постави потпрашање.
„Ставот на ВМРО-ДПМНЕ по однос на членството во НАТО и во ЕУ е добро познат. Тоа дали ставовите ќе успееме да ги усогласиме или не, ќе видиме откако ќе падне оваа влада“ – рече Николоски, но не одговори директно на прашањето дали неговата партија ги прифаќа програмските определби на Левица.
Деновиве се актуелни анализите на програмските заложби на Левица, за која има аргументи со кои се потврдува убедувањето во јавноста дека е радикалната десничарска партија.
Меѓу другото, во Левица со години се промовира поништување на Преспанскиот и Охридскиот договор, како и на договорот за добрососедство со Бугарија. Во доменот на политичкиот систем, позната е заложбата на Левица и за укинување на владата. Меѓу другото, програмата на оваа партија предвидува и забрана на употреба на името ВМРО и укинување на законите со кои се регулира употребата на јазиците во Северна Македонија.
Исто така, партијата на Апасиев кој се „прослави“ со вулгарности, пцости и говор на омразата во јавната комуникација, бара итно отчленување од НАТО, како и избегнување од стратешкиот интерес за членство во Европската Унија и склучување стратешко партнерство со Кина. Во меѓународните односи, Левица се залага и за отповикување на признавањето на Косово, Израел и Јужна Кореја.
