Тимот за односи со јавноста на бугарскиот премиер Кирил Петков беше уловен „ин флагранти“ при спроведување на дејствието на ретуширање на историјата во обид. Аналитичкиот центар за опсервација и толкување на сигналите од говорот на телото „Твое тело-твој збор“ направи анализа на овој чин. За што всушност станува збор?
Откако на 19 февруари беше објавена фотографија на која се гледаат македонскиот премиер Димитар Ковачевски, американскиот државен секретар Ентони Блинкен и бугарскиот премиер Кирил Петков, веќе на 20 февруари, таа иста фотографија беше обработена на начин што македонскиот премиер е едноставно „исечен“ од фотографијата.
Зошто некој би го направил тоа? Едноставно, на аналитичарите на говорот на телото ангажирани во тимот за односи со јавност на бугарскиот премиер Петков, не им се допаднало тоа што го виделе на оригиналната фотографија. На неа, главата на американскиот државен секретар Ентони Блинкен е навалена кон македонскиот премиер Ковачевски, што во анализите на говор на тело јасно покажува дека Блинкен е повеќе наклонет кон македонскиот премиер отколку кон бугарскиот, со самото тоа и наклонетоста на САД кон Северна Македонија во спорот си Бугарија.
Од тука, јасно се гледа дека скандалозното, дилетантско „ретуширање“ на фотографијата, Бугарија има за цел да ја изврти непријатната вистина и лажно да прикаже поддршка на Блинкен за Петков, на сметка на Ковачевски.
Бугарските аналитичари знаат дека говорот на телото е неискажаниот дел од комуникацијата што го користиме за да ги откриеме нашите вистински чувства и да и дадеме поголемо влијание на нашата порака.
Комуникацијата се состои од многу повеќе од зборови. Невербалните знаци како тонот на гласот, гестовите и држењето на телото, во овој случај главата, ја играат својата улога.
Аналитичарите од Бугарија ја имале на ум статистиката дека само седум проценти од пораката се пренесува преку зборови, а останатите 93 проценти доаѓаат од невербална комуникација.
Затоа, не зачудува ваквата реакција од бугарска страна, имајќи предвид дека и во минатото биле големи љубители на ретуширање на историските факти, свесни дека низ историјата најчесто се наоѓале на погрешната (губитничка) страна.
Аналитички центар за опсервација и толкување на сигналите од говорот на телото „Твое тело-твој збор“
Оградување, одбрана и заштита: Ова е козерија. Секоја сличност на овој текст со реалноста е (не)намерна.