Од самиот почеток на кризата во Украина нашиот став е дека недвосмислено го поддржуваме територијалниот интегритет и суверенитет на Украина. Одлуката на Русија за признавање на украинските региони Донецк и Луганск како самонаречени „Народни Републики“ е директен напад врз територијалниот суверенитет и интегритет на Украина и кршење на договорите од Минск и меѓународното право и одлуките на Советот на ООН од 2015 на кои е обврзана и Русија, посочуваат од Министерство за одбрана за ЦИВИЛ Медиа.
Ги осудуваме сите прекршувања на меѓународното право и се придружуваме на повикот на сојузниците за враќање кон дипломатски дијалог и мирно решавање на кризата.
На прашањето како ќе влијае воената ескалација во Украина на економските и општествено-политичките состојби и процеси во Северна Македонија и земјите на Западен Балкан, од МО уверуваат дека безбедносната состојба во Северна Македонија е стабилна и нема потреба од загриженост.
Се разбира дека која било нестабилност на европскиот континент како што е ескалацијата на ситуацијата во Украина може да има безбедносни импликации врз цела Европа и токму затоа меѓународната заедница инсистира на дипломатски дијалог и мирно решавање на кризата. Но, целиот овој период од неколку месеци наназад се преземаат активности за гарантирање на безбедноста и стабилноста на Европа.
Безбедносната состојба во Северна Македонија е стабилна и нема потреба од загриженост. Тоа го потврдуваат институциите задолжени за внатрешната безбедност.
Дополнителен аргумент за тоа е нашето членство во НАТО – Северна Македонија е дел од пошироката безбедносна заедница, од најголемиот воено политички сојуз и нашите граѓани не треба да бидат вознемирени.
Нема да се дозволи прелевање на кризата на европскиот континент и на регионот. Тоа вчера го потврди генералниот секретар на НАТО, Столтенберг кој рече дека НАТО ќе направи се што е потребно да ги заштити сојузниците и уште еднаш упати силен повик до Русија да се врати кон патот на дипломатијата.
Така што, можете да бидете сигурни дека има постојана комуникација и координација од домашните институции и од НАТО, и дека се превземаат сите чекори за заштита на безбедноста и сигурноста.
Она што е значајно да се потенцира, е дека сме во секојдневна интензивна координација со сојузниците, работиме во интерес на нашата колективна безбедност и заштита“, велат од МО.