ВЕСТ НА ДЕНОТ
Опозицијата започна со блокада на Собранието, за власта тоа е неодговорно и за политички цели
Политичката партија ВМРО-ДПМНЕ и коалицијата „За обнова на Македонија“ од денеска почнуваат со активна блокада на Собранието која ќе трае сè до договорот за датум за предвремени парламентарни избори. Власта, сепак смета дека овој чекор е за политички цели и потенцира дека лидерска средба заснована на уцени и закани нема да има. Доколку евентуално се одржи лидерска средба, според нив, таа треба да биде за прашања кои се стратешки и кои значат подобар живот на граѓаните,
ИЗЈАВА НА ДЕНОТ
Сакаме процесот да биде транспарентен и инклузивен зашто се работи за хиперсензитивна материја која може да има широк појас на консеквенции во однос на она што се нарекува имплементирање на демократијата во најширока смисла на зборот. Едно од посебните укажувања на меѓународниот фактор беше дека најдобро ќе биде Изборниот законик да биде донесен најмалку шест месеци пред изборите, затоа што тоа се правила на игра кои треба да се почитуваат. Предуслов е и вториот сегмент, а тоа е да се почитува начелото на консензуалност, појасни Тупанчески.
ВОЈНА ВО УКРАИНА
Шефот на регионалната воена управа на Луганск, Серхи Хаидаи, преку Твитер објава ги демантираше лажните вести што ги шират Русите дека нивните војници наводно стигнале до административната граница на самопрогласената „ЛПР“.
Поради континуираните воени неуспеси на Русија во Украина, главните уредници на телевизиските канали, онлајн медиумите и про-Путин бот армијата веќе добиваат инструкции да се префрлат на нова информативна политика, објави Главната разузнавачка управа на Министерството за одбрана на Украина на Телеграм
Германија ќе обезбеди целосна поддршка на Украина во истрагата и гонењето на сторителите на воените злосторства во Буча и другите градови во Украина, соопшти германската министерка за надворешни работи Аналена Бербок на својот Твитер профил
Денес направивме уште еден чекор – многу важен, и не само формален чекор – на нашиот пат кон Европската унија. Украина го достави вториот дел од одговорите на специјалниот прашалник што треба да го пополни секоја земја која претендира да биде дел од Европската унија. Обично за ова се потребни месеци и месеци. Но, ние направивме сè за неколку недели. Ова е документ кој содржи илјадници страници, изјави уктраинскиот претседател Володимир Зеленски во своето видео обраќање до нацијата.
На насловната страница на рускиот провладин пропаганден портал Лента.ру се појавија повеќе од десетина написи во кои се критикува претседателот Путин и војната против Украина. Подоцна тие исчезнаа од страницата, но копија од главната страница е зачувана во веб-архивата. На насловната страница извесно време имаше вести со наслови „Путин ја покрена една од најкрвавите војни во XXI век“, „Владимир Путин се претвори во мизерен и параноичен диктатор“, „На руската елита и е здодевно од непотизам и клевета“, и написот „Во војна полесно се покриваат неуспесите во економијата. Путин мора да замине. Тој води бесмислена војна и ја води Русија во бездна“.
ФЛЕШ ВЕСТИ
РЕАКЦИЈА Со одлуката на вчерашното заседание на Светиот Синод на Вселенската Патријаршија се призна македонската православна црква за канонска и валидна во сеправославниот свет, и воспоставува канонско и литургиско општење со неа.
ПРЕГОВОРИ Северна Македонија нема ништо против да ја внесе бугарската заедница во Уставот, заедно со другите заедници коишто се спомнати таму, бидејќи ако по нешто сме препознатливи во светот, тоа е по односот на државата кон заедниците, но сензитивноста е во непредвидливоста на процесот и токму за тоа се разговара во моментов со Софија“, изјави денеска министерот за надворешни работи Бујар Османи.
ИНКЛУЗИВНОСТ Фондацијата за образовни и културни иницијативи „Чекор по чекор“ од 5 до 15 мај го спроведува проектот „Биди ИН, биди ИНклузивен, биди ИНклудиран“. Овој проект е наменет за кревање на јавната свест за важноста на инклузивното образование и вклученоста на децата со попреченост во редовните основни училишта.
РОДОВА ЕДНАКВОСТ Од денеска започнува со работа Алијансата за родова еднаквост, платформа која се стреми да го адресира предизвикот на родовата нееднаквост со фокус на работното место. Оваа платформа е иницијатива на Асоцијацијата за е-трговија.
СРЕДБА Претседателот на Владата на Република Северна Македонија Димитар Ковачевски денеска оствари средба со Архиепископот Охридски и Македонски и поглавар Македонската Православна Црква – Охридска Архиепископија г.г. Стефан,. На средбата премиерот Ковачевски му честиташе за радосната веста за одлуката на Светиот Синод на Вселенската Патријаршија со која Македонската Православна Црква – Охридска Архиепископија се прима во евхаристичко заедништво со останатите православни цркви.
БРЗА ПОШТА
Експресната реакција на Руската православна црква како кофа судена вода, шокантно, се истури врз големите македонски патриоти – русофили. Тоа што дел од македонската интелектуална, научна и аналитичка јавност со години го зборува, укажува и предупредува, вчера со непримерно брзата реакција на Руската црква дека за неа, за Руската, Српската останува единствената црковна владетелка во Македонија и врз Македонската православна црква. Па, еве, за многумината вљубеници во руската црковна и воопшто државна величина, нека биде ова тој студен руски туш на отрезнување, пишува Зоран Иванов во текстот „Студен туш за нашите русосонувачи“.
Д.Мишев