Вонредниот и ополномоштен амбасадор на Унгарија во Украина, Иштван Игјарто вели дека неговата земја нема територијални претензии во Закарпатија, западниот регион на Украина, пренесува Укринформ.
„Немаме територијални претензии кога станува збор за Закарпатија“, рече амбасадорот во интервју за ТВ каналот Еспресо.
Русија е држава агресор, воен агресор, додека Унгарија целосно го поддржува територијалниот интегритет и суверенитет на Украина, подвлече амбасадорот.
„Целосно ги осудуваме сите прекршувања на човековите права врз украинските граѓани. Ја повикуваме меѓународната заедница, како и украинската страна, да ги истражат овие прекршувања. Ние се залагаме за мир“, рече Игјарто.
Како што беше соопштено, на 3 мај, Амбасадата на Унгарија во Украина ја осуди изјавата на секретарот на Советот за национална безбедност и одбрана на Украина, Олексеј Данилов, кој рече дека рускиот претседател Владимир Путин ја предупредил Унгарија за инвазијата.
