ВЕСТ НА ДЕНОТ
МНР ја објави официјалната верзија на Протоколот
Министерството за надворешни работи во скенирана верзија го објави интегрално Протоколот од вториот состанок на Заедничката меѓувладина комисија со Бугарија. Документот може да се види на официјалната веб-страница на МНР.
Протоколот беше потпишан во рамки на вториот состанок на Заедничката меѓувладина комисија со Бугарија, согласно членот 12 од Договорот за добрососедство.
ИЗЈАВА НА ДЕНОТ
Пендаровски за ЦИВИЛ: Нашата различност е нашата најголема предност
„Малкумина од нас се подготвени да прифатат дека нашата различност е нашата најголема предност. Дека колку сме поразлични, толку побогата е нашата култура и толку поширок е хоризонтот на можностите за напредување. Само од нас зависи дали и колку сме подготвени да ги прифатиме различните од нас, да ги почитуваме и да ја искористиме нивната креативност за општо добро“, вели претседателот Стево Пендаровски за ЦИВИЛ во рамки на Иницијативата „Чекор напред кон мултикултурно општество“.
ВОЈНА ВО УКРАИНА
Никој во светот не инвестира во тероризам повеќе од Русија, а тоа бара правен одговор, изјави украинскиот претседател Володимир Зеленски во своето видео обраќање во средата навечер.
Руските сили намерно гранатираа затвор во Оленивка, каде што се држеле украински воени затвореници, се вели во соопштението на Фејсбук од Генералштабот на вооружените сили на Украина, пренесува Укринформ.
„Вооружените сили на Руската Федерација извршија насочено артилериско гранатирање на казнено-поправна установа во населбата Оленивка во областа Доњецк, каде што, меѓу другите, беа држени и украински затвореници“, се вели во соопштението.
*
Во градот Миколаев, пет лица загинаа, а 13 други беа ранети откако руско гранатирање погоди станица на јавен превоз, напиша на Телеграм Хана Замазеева, шефица на Регионалниот совет на Миколаев.
*
Во текот на изминатиот ден, руските војници убија осум цивили во регионот на Доњецк, пренесува Укринформ.
„На 28 јули, Русите убија осум цивили во регионот на Доњецк: тројца – во Бахмут, двајца – во Торецк, еден – во Орливка, еден – во Хирник и еден – во Соледар. Уште 19 лица беа повредени“, објави на Телеграм Павло Кириленко, Шефот на регионалната воена управа на Доњецк.
ФЛЕШ ВЕСТИ
ДОНАЦИЈА Министерството за одбрана и Армијата на Република Северна Македонија потврди дека и се донирани тенкови на Украина, истакнувајќи оти се работи за тенкови од третата генерација, а со оглед на развојот на технологијата, неконкурентни и некомпатибилни. Од Министерството без да го наведат бројот на донираните тенкови информираат дека дополнително во наредниот период би требало да се трошат ресурси за уништување на тенковите, што според нив е нецелисходна активност за нашата Армија.
АНТИКОРУПЦИЈА Државната комисија за спречување на корупција (ДКСК) на денешната седница одлучи да даде препорака до Министерството за здравство за подобрување на текстот на Законот за здравствена заштита со што ќе се овозможи здравствените установи да имаат лиценца за работа, но и до Фондот за здравствено осигурување да се зајакнат редовните контроли.
ЗДРАВСТВО Ние добивме материјали од „Жан Митрев“, беа кооперативни и ни ги доставија сите побарани материјали. Се работи за 560 ковид-пациенти кои биле третирани со хемофилтрација. Ќе ни треба време за анализа на тие 560 досиеја коишто се обемни. Да бидеме реални 560 предмети ќе ни одземат доволно време за ние на јавноста на крај да ѝ дадеме конечен прецизен извештај што се случувало во Жан Митрев, изјави министерот за здравство Беким Сали во одговор на новинарско прашање во врска со случајот „Жан Митрев“ на отворањето на реновираниот Хируршки ургентен центар во Скопје.
ДЕМАНТ Директорот на Управата за извршување на санкции Марјан Спасовски во целост ги отфрла наводите и обвинувањата на поранешниот директор на затворот Идризово, Реџеп Реџепи изнесени во порталот,, А1 он”, за наводни притисоци за преместување на Бојан Јовановски и Сеад Кочан во други полоши услови, информираат од Министерството за правада.
ЕНЕРГИЈА Навреме ќе биде испорачана топлинската енергија до домаќинствата во Скопје, граѓаните не треба да се грижат, порачува вицепремиерот за економски прашања Фатмир Битиќи. На денешната прес-конференција во Владата, Битиќи нагласи дека она што е најважно во моментот е постапката за избор на нов економски оператор на топлинска енергија да биде транспарентна и да заврши навреме.
Б. Јордановска
