ВЕСТ НА ДЕНОТ
Денот на независноста на Украина одбележан и во Скопје
Преку формирање жив синџир, беше поставен светски рекорд за изведување на Националната химна на Украина, во рамки на глобалната иницијатива „The free world gathering“. На плоштадот „Македонија“ во Скопје денеска беше одбележан Денот на независноста на Украина. Странските амбасадори во земја со знамиња во рацете дадоа поддршка на Украина која точно пола година е во војна, откако беше нападната од Русија на 24 февруари.
ИЗЈАВА НА ДЕНОТ
ВОЈНА ВО УКРАИНА
Европскиот суд за човекови права (ЕСЧП) итно ја разгледа претставката на Украина во врска со почитувањето на правата на заробените украински бранители од страна на Русија и ја продолжи примената на итните мерки во меѓудржавниот случај „Украина против Русија (Х)“ во врска со воените затвореници, соопшти прес-службата на Министерството за правда на Украина.
*
Руските сили убиле еден цивил и повредиле уште двајца во регионот на Доњецк на 23 август, објави на Телеграм шеф на регионалната воена управа на Доњецк, Павло Кириленко.
„На 23 август Русите убиле еден цивил во регионот на Доњецк – во Бахмут. Уште две лица се повредени“, напиша тој.
.*
Овој ден го среќаваме во различни околности, услови, па дури и во различни временски зони, но со единствена цел – да ја зачуваме независноста и победата на Украина! Ние сме обединети заедно.
Среќен ден на независноста, Украина! порача Зеленски во честитката за Денот на независноста.
ФЛЕШ ВЕСТИ
ОБВИНИТЕЛСТВО Советот на јавни обвинители на Република Северна Македонија на денешната 63-та седница, која беше затворена за јавноста, едногласно одлучи да се отфрли жалбата за суспензијата на обвинителката Вилма Русковска како неоснована. Со ова се потврдува решението на републичкиот јавен обвинител Љубомир Јовески од 16 август годинава со што обвинителката Русковска останува суспендирана од својата функција.
СОЦИЈАЛНИ МРЕЖИ Сајтот за социјални медиуми ЈуТјуб,во сопственост на Google презеде акција по одлуката на Мета да го отстрани Тејт од Фејсбук и Инстаграм. Поранешниот кик-боксер се прослави во 2016 година кога беше отстранет од ТВ-шоуто „Големиот брат“ поради видео на кое изгледаше како тој да напаѓа жена. Тој продолжи да се здобива со озлогласеност на интернет – со тоа што Твитер го забрани затоа што рече дека жените треба да „сносат одговорност“ ако се сексуално нападнати.
РАЗГОВОР Министерот за надворешни работи, Бујар Османи, по повод Денот на независноста на Украина, денес, оствари телефонски разговор со министерот за надворешни работи на Украина, Дмитро Кулеба. Упатувајќи искрени честитки по повод Националниот ден, министерот Османи изрази поддршка за борбата на украинскиот народ, која воедно претставува борба за нашите заеднички современи и демократски вредности, како и заштита на меѓународниот поредок.
ОБРАЗОВАНИЕ Во претстојната учебна 2022/2023 година ќе бидат ангажирани 720 образовни асистенти во основните училишта, што е 220 повеќе од минатата учебна година. Одлуката ја донесе Владата имајќи ги предвид искажаните потреби на родителите на учениците со попреченост, соопшти Министерството за образование и наука.
ЦИВИЛНИ АКТИВНОСТИ
Зелен ЦИВИЛ (организациска единица на ЦИВИЛ) организира панел дискусија на тема „Зелени вредности, трансформација на општеството во корист на сите“, што ќе се одржи на 25 август, четврток со почеток во 12:30 часот. Учесници на панелот се Ива Петрунова магистер, инженер архитект, урбан социолог, доктор на општествени науки, Тони Поповски, архитект, политиколог, независен консултант, колумнист и Џабир Дерала, претседател на ЦИВИЛ-Центар за слобода.
АНАЛИЗИ
АНАЛИЗИ
Честопати, статиите се проследени со сензационалистички наслови, извадени од контекст, и неретко, не се ниту во корелација со текстот во статијата. Секако, се е во служба на руската пропаганда, така да и без да се чита текстот, според насловот читателот треба да ја разбере руската „вистина“. Неретко, во пренесувањето на некоја информација од тековната воена состојба во Украина, се користат само руски извори, како ТАСС, РИА, Россиа 1, иако за истата постојат релавантни извори од Укаринска, па и од трета страна (Би-Би-Си, Еуроњуз, СИ- Ен- Ен), и истите или целосно се занемаруваат , или се спомнуваат само со една реченица, на дното од текстот, и понекогаш се карактеризираат како неверодостојни, пишува Драган Мишев во анализата „ Руска пропаганда во македонските мејнстрим медиуми“
СЛОБОДНА ЗОНА
Идеја?! Па во Собранието имаше многу конкретен Предлог на ЕУ! Што правеа ВМРО-ДПМНЕ и Левица и какви зборови употребија за високата претставничка на ЕУ (во нејзино присуство!)? Не употребија ли изрази со физиолошки потреби за Предлогот на ЕУ, па не го прочита ли толкавото „НЕ” на маиците?! За што беше тоа НЕ? Не знам што ги учат новинарите на студии, но ако имаш екстремна (во смисла на вознемирувачка) вистина, па не ја мачкај после со екстремна (вознемирувачка) невистина, за да добиеш баланс, компромис, во замена за објективност! Дозволено е објективната вистина да е вознемирувачка! Балансот не е објективност! Не се наоѓа вистината меѓу два екстрема! Особено, ако едниот се измислува, пишува Емилија Целакоска во колумната „ Компромис меѓу лага и вистина е лага“
Како и зошто се наметнува некоја тема за која разговараме, дебатираме или пишуваме? Многупати сум размислувал за оваа, а одговорот останува далечен како и на почетокот кога си го поставив тоа прашање. Колку ли светови има што постојат истовремено, а само во различна димензија? Мора да се повеќе зошто имам впечаток дека поминуваме од еден во друг таков свет без да знаеме за тоа. Она што е сигурно е што ниту еден од нив не е вистинскиот и реалниот. Вистината не постои зошто е претешка за човечкиот мозок или мисла. Веројатно и затоа се избегнува а и таа го избегнува човечкиот род, пишува Војо Маневски во колумната „ Двоен свет“
Д.Мишев
