Германскиот канцелар Олаф Шолц му порача на украинскиот претседател Володимир Зеленски дека Берлин никогаш нема да ги признае резултатите од лажните референдуми на привремено окупираните територии на Украина, ја пренесува Укринформ објавата на Шолц на Твитер.
„Лажните референдуми што Путин ги спроведе во незаконски окупираните области на Украина се безвредни. Тие се нелегални според меѓународното право. Германија никогаш нема да ги признае наводните резултати. Денеска го уверив украинскиот претседател Володимир Зеленски во телефонски разговор“, напиша тој.
The sham referendums carried out by #Putin in the illegally occupied areas of #Ukraine are worthless. They violate international law. Germany will never recognise the so-called results. I assured @ZelenskyyUA of this in a phone call yesterday.
— Bundeskanzler Olaf Scholz (@Bundeskanzler) September 29, 2022
Според портпаролот на германската влада Штефен Хебестрајт, Шолц и Зеленски размениле мислења за воената, политичката и економската ситуација во Украина, како и за можностите за натамошна поддршка, вклучително и за обнова на Украина.
Канцеларот рече дека Германија нема да престане да обезбедува специфична политичка, финансиска и хуманитарна помош за Украина, како и поддршка за заштита на нејзиниот суверенитет и територијален интегритет, вклучително и снабдување со оружје.
Подготви: Д.Мишев
