Членовите на работната група составена од стручни советници на премиерот, претставници на ФЗОРСМ, Министерството за здравство, од фармацевтската индустрија како и од Асоцијацијата за цистична фиброза, денеска ги дефинираа Предлог – законските одредби за набавка на сите лекови од овој тип, вклучително и лекот „Трикафта”.
Откако експертите на денешниот состанокот ги образложија своите ставови во однос на Предлог – измените, брзо ги усогласија предлог одредбите за законот за лекови и медицински средства и за законот за здравствено осигурување, со што се прецизира видот на постапката која треба да се спроведува, врз основа на склучени посебни договори за набавка на лекот, а со кои ќе се обезбедат поповолни цени.
Задоволни сме од работната група за измена на законите за полесна набавка на лекови, изјави за МИА, претседателот на Асоцијацијата за цистична фиброза, Фики Гаспар, по денешната средба во Министерството за здравство.
– Работната група составена од претставници на Министерството за здравство, Фондот за здравствено осигурување, од јавни набавки, како и од Владата, работи брзо и посветено. Се работи на промена на трите закони. Како Асоцијација, ова е тоа што го баравме и засега, сметаме оти процесот ќе има позитивен исход, подвлече Гаспар.
Тој повтори дека се работи на системско решение, не само за нив, туку и за други проблематики како нивните.
– Мојата надеж е дека нема да излезат многу препреки и оти за брзо време ќе се излезе со предлог-закон што ќе може да оди во Собрание, додаде Гаспар.
Тој потсети дека со интервентниот увоз на лекот „трикафта“, неопходен за лицата со цистична фиброза, нема проблеми, тој е порачан, а сега се чека компанијата да ја заврши нејзината работа.
