Работната група за спроведување на изборните реформи, оформена од Министерството за правда, денеска ја имаше првата, конститутивна седница. Во работната група се вклучени претставници на политичките партии, институции надлежни са спроведување на изборните процеси – ДИК, ДКСК, ДЗР, МИОА, МВР, претставници на невладини организации и синдикати. Претседател на работната група е Александар Новаковски, експерт и поранешен претседател на ДИК.
Во Работната група учествува и ЦИВИЛ, чии претставници дадоа свој придонес во дискусијата за начинот на соработка и понатамошна работа на ова тело.
Целта на работната група е имплементирање на препораките на ОБСЕ/ОДИХР. Соодветно на условите и капацитетите, како и динамиката поставена во поширок политички контекст, Работната група ќе се занимава и со подготовка и предлог решенија за нов Изборен законик.
Министерот за правда, Кренар Лога, истакна дека преку претставници од министерството ќе го даде својот придонес во работата на група, а воедно ги повика ВМРО-ДПМНЕ да се приклучат во процесот со членство во работната група и преку предлози и иницијативи, како и конструктивна дебата да придонесат кон реформите во изборното законодавство.
„ВМРО-ДПМНЕ треба да престане со малтретирање на јавноста преку медиумите“, рече Лога.
Новаковски на прес-конференцијата по завршување на средбата истакна дека денеска се договорија одредени работи што се клучни за отпочнување на работата на работната група.
„Се договоривме да започнеме со имплементирање најпрвин на забелешките на ОБСЕ/ОДИХР, а потоа ќе се работи на нов Изборен законик. Се надевам дека ќе излеземе со предлог и дека ќе успееме да ги запазиме роковите кои се утврдени со некои европски стандарди и овие измени да бидат во еден период од 6 месеци пред изборите“, изјави Новаковски.
Учесниците во Работната група добија насоки да достават препораки за измени на Изборниот законик, како и предлози за методологија на нејзината работа. Следна средба ќе се закаже во најскоро можно време.
Б. Јордановска
