Министерот за правда Кренар Лога изјави дека се уште не го добиле Записникот од седницата на Судскиот совет, која се одржа на 26 април, на која беше разрешена претседателката на Советот, Весна Дамева.
„Денеска проверивме пред да дојдеме овде дека такви записници не се пуштени кај нас, немаме никаква информација освен тоа што вие го имате дадено како медиуми. Другиот дел останува нејасен, бидејќи не е објавена никаква одлука во Службен весник. Така што не би сакал да навлегувам во оваа проблематика додека немам на хартија тоа што веќе го имам побарано како министер за правда“, рече Лога на новинарско прашање по конститутивната седница на Работната група за реформа на изборното закондавство, пренесе МИА.
Судскиот совет вчера втор пат ја одложи седницата на која требаше да гласа за избор на нов претседател, при тоа не беше наведената причината за одложување. Доскорешната претседателка Весна Дамева беше разрешена на седницата на 26 април, во тензична атмосфера и според мислење на експерти, во незаконска постапка. Нејзиното разрешување го иницира заменикот Селим Адеми, предлог кој по неколку часа тензии и расправии, доби поддршка од 7 од 13 члена на Советот.
