Струшкиот градоначалник, воедно и член на претседателството на ДУИ, Рамиз Мерко донел одлука да го замрзне членството во партијата откако беше ставен на црната листа на САД.
Истовремено, од ДУИ излегоа со барање за спроведување на сеопфатна истрага за наводите на Стејт департментот за корупција.
„Раководството на партијата го прифати предлогот на градоначалникот на Струга, Рамиз Мерко, да ги замрзне членството и активностите во партијата и во нејзиното раководство. Тој веќе не е член на раководството на ДУИ, ниту член на партијата додека не се завршат истрагите против него“, соопшти денеска портпаролот на ДУИ и министер за надворешни работи, Бујар Османи.
ДУИ бара институционална верификација на сите тврдења на Стејт департментот и веднаш да почне сеопфатна истрага за нив. Во јавното обвинителство има отворени шест постапки против Мерко.
„ДУИ има јасни ставови по однос на владењеето на правото и борбата против корупцијата и таквите ставови се претворени во формални одлуки на партијата“, рече Османи.
Османи соопшти дека ДУИ ја прекинува и предизборната активност во Струга, додека не се создадат нови услови за нивно организирање. Партијата истовремено донела заклучок со кој бара и проверка на сите функционери, почнувајќи од лидерите на сите политички партии, преку високите функционери, до најниските ешалони.
Тој посочи дека ДУИ ги почитува ставовите на САД и ги смета за добронамерни., и додаде дека секој успех на оваа држава носи печат и на САД.
