Абдуш Демири од опозициската Беса и Зулфи Адили од владејачката Алијанса за Албанците се кандидатите за член на ДИК.
Предлог листата е веќе доставена и се очекува Комисијата за избори и именувања да го утврди кандидатот, потврдија доцна попладне од Собранието. Сепак, голема е веројатноста дека највисокиот изборен орган ќе ги спроведе претседателските и парламентарните избори в година во нецелосен состав.
Адбуш Демири е поддржан од албанската опозициска коалиција Европски сојуз за промени, информираше денеска пратеничката на Алтернатива дел од оваа коалиција.
Кандидатот Зулфи Адили, пак, е подржан од Европската народна партија на Аријанит Хоџа.
-Сметаме дека тој кандидат може да ја врши таа функција според сите законски прописи, рече Хоџа во изјава за МИА.
Скендер Реџепи-Зејд, претседател на Движењето на народот, не поддржа ниту еден кандидат, а во изјава за МИА рече дека процениле оти никој од предложените кандидати не бил соодветен.
Комисијата за прашања на изборите и именувањата претходно утврдено листа со пет кандидати за член на ДИК: Берат Даути, дипломиран правник од Тетово, Абдуш Демири, дипломиран економист од Тетово, Роберт Трајковски, магистер по мир и развој од Куманово, Зулфи Адиљи, дипломиран правник од Скопје и Самир Ракипи, дипломиран правник од Тетово.
Член на Државната изборна комисија се избира со двотретинско мнозинство.
Беса обвини дека иако местото во ДИК и припаѓа на албанската опозиција, власта прави терен да не се избере нов член за да не се замери со Алијанса за Албанците пред одлуката за настап на заеднички листи и за поддршка на консензуален претседателски кандидат.
Според распоредот на силите во Собранието ни за Демири, ни за Адили нема двотретинско мнозинство и најверојатно ДИК ќе остане без еден член откако Кренар Лога стана министер за правда.
М. Д.
