Започна рокот за собирање потписи за кандидати за претседател и пратеници
Рокот за собирање потписи за кандидати за претседател и за кандидати за пратеници започнува денеска и ќе трае до 8 март, согласно роковниците на Државната изборна комисија (ДИК). Кога подносител на листа на кандидат за претседател е група избирачи, потребно е да се соберат најмалку 10.000 потписи од запишаните избирачи во Избирачкиот список, додека кога подносител на листа на кандидат за претседател се пратеници, потребно е да се соберат најмалку 30 потписи од пратениците.
Кандидатите за претседател вчера ги соопштија и ДУИ кои го предлагаат министерот за надворешни работи Бујар Османи и Движење ЗНАМ-За Наша Македонија кои ќе настапат со лидерот Максим Димитриевски. Претходно СДСМ објавија дека нивен кандидат ќе биде актуелниот шеф на државата Стево Пендаровски, ВМРО-ДПМНЕ ја предлага професорката Гордана Силјановска Давкова, Стевчо Јакимовски е кандидат на ГРОМ, партијата што ја предводи, професорката Билјана Ванковска на Левица, Арбен Таравари на албанската опозициска коалиција ВРЕДИ. Мерсиха Смаиловиќ e поддржана од Бошњачкиот демократски сојуз (БДС). Својата независна кандатура за претседател во октомври, лани, прв ја најави Вело Марковски, иако е член на ВМРО-ДПМНЕ.
Кандидатурата на Османи ја објави претседателот на ДУИ Али Ахмети кој најави дека по изборите ќе се залага за уставни измени, за избор на претседател во Собранието и за впишување на Бугарите во Уставот.
ИЗЈАВА НА ДЕНОТ
Борел ги повика земјите-членки на ЕУ да испратат повеќе муниција во Украина
„Украинските војници се решени да се борат, но им треба муниција. Итно и во огромни количини, се наведува во писмото на Борел, што вчера беше испратено до министрите за надворешни работи и за одбрана на ЕУ.“, порача Високиот претставник на ЕУ за надворешна политика и безбедност Жозеп Борел, повикувајќи ги земјите-членки на Европска Унија повеќе да направат за снабдување со муниција на Украина.
ВОЈНА ВО УКРАИНА
Советот на Европа, по повод две години од руската агресија врз Украина, ја повтори целосната поддршка за Кијив.
*
Советот на ЕУ денеска ги одобри новите санкции против Русија, кои првично беа одобрени во завчера, изјави високиот претставник на ЕУ за надворешна политика и безбедност, Жозеп Борел.
*
Здружение на Украинците во Македонија „Лесја Украинка“ на 24 февруари (сабота), со почеток од 10 часот ќе одржи мирен марш по повод двегодишнината од почеток на руската сеопфатната инвазија врз Украина, информираат од здружението.
ФЛЕШ ВЕСТИ
ПАСОШИ Дополнителниот заменик министер за внатрешни работи Митко Бојмацалиев, синоќа, на Граничниот премин Богородица, ги пречека новите 140.000 обрасци за пасоши.
ПОТПИСИ До Државната изборна комисија (ДИК) досега се поднесени вкупно седум изјави за прифаќање на иницијатива за собирање потписи за кандидирање за Претседател на Република Северна Македонија. Собирањето на потписи за листи на кандидат за претседател на државата почнува утре.
АЛ-ПРЕС
Редакциски избор од албанските медиуми:
- Визион Плус: Албанија и Британија со работна група против организираниот криминал
- Клан: Немаше консензус за амнестија, социјалистите го повлекоа предлог-законот од Собранието
- Сури: Судот ги ослободи демонстрантите/ Барди: Беа земени како заложници, полицајците се идентификувани и ќе сносат лична одговорност
- Перископи: Продолжува притворот на Тачи Весели
- РСЕ: Османи вели дека во Косово ќе се гради регионален центар за жени и безбедност
- КОЛУМНА – Коха: Со овој молив пишуваше цел Балкан – и Зигмунд Фројд
СЛОБОДНА ЗОНА
„Не може секој сè да знае, многумина не ја научивме Конфучиевската аксиома според која, грубо парафразирам, никој не знае колку треба да знае за да знае дека всушност малку знае па така некако, еве и за главните фаворити на претседателските избори, за кандидатката Силјановска наспроти кандидатот Пендаровски при што, кажано во една реченица, е мошне воочливо дека пред првата за многу кусо време стојат многу сложени едукативни обврски, стојат задачи да учи и да научи и не само да научи туку и да разбере некои основни лекции…“, По допрен глас –„Возот за претседателка ќе ѝ замине и така, учејќи, и 8-ми мај ќе ѝ помине без таа тоа воопшто и да го забележи“.
Подготви: Д. Тахири
