Таканаречените избори во Русија се нелегални и се одржуваат под брутална репресија
ЦИВИЛ – Центар за слобода, како организација со долгогодишно искуство во изборниот мониторинг, оценува дека изборниот процес за „ре-избор“ на рускиот претседател претставува флагрантно кршење на сите демократски принципи и стандарди, се наведува во соопштение од ЦИВИЛ.
Нема услови за фер и демократски изборен процес во Руската Федерација. Таканаречените избори ќе бидат злоупотребени само за дополнително угнетување на населението во таа земја, веројатно најжестоко од распадот на Советскиот Сојуз наваму.
Политичкиот контекст во кој се одржуваат руските избори во 2024 година е диктаторски, во услови на целосна контрола и воена цензура во медиумите. Опозицијата во Русија е ефективно уништена, особено по убиството на главниот опозициски лидер Алексеј Навални на 16 февруари 2024.
ИЗЈАВА НА ДЕНОТ
Агелер: Притисоци врз судската власт е нешто што мора да престане
Притисоци врз судската власт во Северна Македонија е нешто што мора да престане. Судиите мора да бидат ослободени за да можат да го практикуваат правото. Граѓаните на оваа земја имаат потреба од тоа, и се повеќе го бараат тоа, порача американската амбасадорка Анџела Агелер во обраќањето на Меѓународна конференција на тема „Уставно-судска заштита на слободата на мислата и слободата на јавно изразување на мислата“, организирана од Уставниот суд по повод 60 години од неговото основање со поддршка на Мисијата на ОБСЕ во Скопје.
ФЛЕШ ВЕСТИ
ГЛАСАЊЕ Согласно преодната одредба од измените на Изборниот законик која ќе се применува само за изборите оваа година, избирачите ќе може да гласаат со лична карта или со патна исправа чија што важност истекла во периодот од девет месеци до денот на одржување на изборите, информираа денеска од Државната изборна комисија.
ЕКСТРАДИЦИЈА Во изјава за медиуми по отворањето на денешната меѓународна конференција „Уставно-судска заштита на слободата на мисла и слободата на јавно изразување на мислата“ министерот Лога информираше дека според зборовите на неговиот колега, министерот за правда од Турција, очекува дека екстрадицијата би била за брзо време.
ИЗБОРИ Државната изборна комисија соопшти дека заклучно со 14.03.2024, во подрачните одделенија и канцеларии на ДИК, увид на своите податоци во Избирачкиот список направиле 4859 лица. 7 лица поднеле барање за промена на своите податоци, 19 лица поднеле барање за запишување на своите податоци и 5 лица поднеле барање за бришење на податоци во Избирачкиот список.
ЕКОНОМИЈА Листата на производи која произлегува од Законот за нефер трговски практики е веќе подготвена, има над 2.500 земјоделски и прехранбени производи и е доставена до стопанските комори.
ЗДРАВСТВО Состојбата со голема кашлица во земјава не е добра и не е стабилна, можно е Комисијата да излезе со построги епидемиолошки мерки.
ВОЈНА ВО УКРАИНА
- Во рускиот ракетен терор денеска во Одеса. Засега се знае дека загинале 16 лица, меѓу кои и вработен во Државната служба за итни случаи. Спасувачите пристигнале да им помогнат на настраданите кога Русите го повториле нападот. Повредени се 73 лица со различен степен на сериозност
- Шефот на европската дипломатија, Жозеп Борел, денеска по состаноците одржани во Вашингтон изјави дека испраќањето нова помош за Украина не може да чека бидејќи за исходот од војната во Украина ќе се одлучува оваа пролет и лето.
- Во Русија, ноќта кон петокот, на 15 март, три беспилотни летала погодија нафтена рафинерија во регионот Калуга, при што беше предизвикан пожар. Според Телеграм каналот ASTRA, оштетена е опремата на компанијата.
- Според извештајот на украинското разузнавање, руските војници можат да гласаат на тековните избори без притоа да го покажат своето лице на избирачките места, каде што е доволна „фотокопија од документите“, што значи дека и загинатите сè уште имаат право на глас.
КОНФЛИКТИ
- Израелскиот премиер Нетанјаху ги одобри плановите за воена операција во Рафа, а Армијата оперативно се подготвува за тоа и за евакуација на жителите, се вели во соопштението кое се пренесува од Агенцијата Анадолу без да се наведат дополнителни детали.
- Нетанјаху не го прифаќа предлогот на Хамас за ослободување заложници во замена за палестински затвореници.
- Израелската војска уби 20 Палестинци и рани најмалку 155 во вооружен напад врз луѓе што чекаа хуманитарна помош на Кувајтската крстосница во Појасот Газа, соопшти палестинското Министерство за здравство, пренесува Агенцијата Анадолу.
ИНТЕРВЈУ
Во интервјуто за ЦИВИЛ МЕДИА, претседателот на КСЗД, Игор Јадровски, потенцираше дека целта им е да бидат присутни и видливи во мониторингот на медиумите и на соицјалните мрежи, каде се очекува најмногу да има вознемирувачки говор, со цел навремено да се санкционираат таквите наративи.
ЦИВИЛНИ АКТИВНОСТИ
ЦИВИЛ – Центар за слобода во понеделник, 18 март, со почеток во 11 часот, ќе организира прес-конференција на која ќе ги презентира своите наоди и оценки произлезени од опсежниот мониторинг на изборниот процес во Северна Македонија. Прес-конференцијата ќе се одржи во прес-центарот на организацијата лоциран на третиот кат во Бизнис центарот Палома Бјанка (линк до локација).
„За време на прес-конференцијата, нашите претставници ќе се осврнат на неколку клучни прашања. Ќе презентираме длабинска проценка на неодамнешните измени на Изборниот законик и нивното влијание врз севкупниот квалитет на изборниот процес. Понатаму, ќе презентираме сеопфатен извештај за дезинформации и пропагандни наративи, заедно со анализа на употребата на говор на омраза во јавните комуникации“, најавуваат од ЦИВИЛ.
СЛОБОДНА ЗОНА
„Руската инвазија врз Украина потврди дека слободата и либералните вредности имаат видливи и невидливи непријатели. Признати во Концептот на бистратешка команда на НАТО од 2010 година, хибридните закани се дефинирани како „оние што ги поставуваат непријателите, со способност истовремено да користат адаптивни конвенционални и неконвенционални средства во остварувањето на своите цели“., пишува авторката Весна Попоска во анализата „(Зло)употреба на медиумскиот простор како бојно поле на вистината“.
„Трамп подготви театарска претстава како да се работи за средба на двајца државници, а Орбан на социјалните мрежи „пригодно“ и не помалку театрално одговори со зборовите „врати се и донеси ни мир, Претседателе!“ Јасно е за каков „мир“ зборува. Но сигурно е дека демократијата нема да се повлече, ниту ќе потклекне, како што рече американскиот претседател.“, пишува Џабир Дерала во колумната „Трамп-Орбановиот театар и грмотевицата на Бајден“.
Подготви: Д. Тахири
