Во Тетово вчера коалицијата „Европски фронт“ усвои политичка декларација за етнички изборен легитимитет, за која беше посочено дека ќе биде испратена до сите релевантни домашни и меѓународни институции.
Декларацијата ја потпишаа сите партии кои го сочинуваат „Европски фронт“, а по обраќањето на сите лидери на партиите, декларацијата ја прочита претседателот на ДУИ, Али Ахмети, по што со кревање рака едногласно беше усвоена.
Главни пораки од политичката декларација
Во образложението на декларацијата беше посочено дека случувањата и чекорите по парламентарните и претседателските избори на 8 мај 2024 година, го доведуваат во прашање духот на Охридскиот договор. Според нив, резултат на тоа е враќање на познатата политика „раздели па владеј“.
„Го повторуваме нашиот евроатлантски курс како единствена алтернатива за заедничката иднина на Северна Македонија и нашата посветеност за целосно спроведување на нормите и духот на Охридскиот договор, Договорот од Преспа и Договорот за добрососедство и затворање на сите отворени прашања со соседите, како предуслов за продолжување на европскиот пат. Ја наведуваме неопходноста од спроведување на консензуалната демократија во согласност со духот на Охридскиот договор и Уставот на Република Северна Македонија.
Повторуваме дека владините коалициски партнери мора да бидат определени од политичката волја на двете најголеми заедници во земјата, Албанците и Македонците, како и легитимните претставници на другите заедници, изразени на слободни, фер и демократски избори, во формата на обичајното право имплементирана во нашата земја кое овозможува легитимност, функционална демократија, социјална кохезија, консензуалност и правична застапеност во носењето одлуки.
Затоа, демократијата кај нас може да биде функционална и стабилна само кога мнозинската заедница ги почитува легитимните претставници на политичката волја на Албанците, Турците, Ромите, Бошњаците и другите заедници, се наведува во декларацијата.
Заканувачки пораки поради мајоризација
Општиот имунитет што го гарантира опстанокот на Македонија е процесот на интеграција. Ако се загрози овој процес, ниту една терапија не може да го спаси пациентот – изјави првиот човек на ДПА, Мендух Тачи, нагласувајќи дека Македонија е единствената земја на Балканот по 90-тите, која останала неповредливи на својата територија и граница. Според Тачи, тоа не се случило случајно, туку се случило пред се со големиот компромис на Албанците.
Според Зиадин Села од Алијанса за албанците, оспорувањето на легитимитетот почнало од предизборната кампања, каде што политичките лидери, како што вели, „трубеле“ со антиалбанизам. Нивниот план, според Села, бил да ја прекршат пресудата на албанскиот народ и другите заедници.
Од друга страна, лидерот на Движењето „Попули“ Скендер Реџепи, во име на Европскиот фронт, ги демантираше најавите од коалицијата ВЛЕН дека дел од пратениците на овој фронт ќе се приклучат на новото мнозинство.
Аријанит Хоџа од Европската демократска партија истакна дека Европскиот фронт ќе застане зад заштитата на гласовите на граѓаните и легитимитетот, додавајќи дека Охридскиот договор е склучен во 2001 година и секое дејствување надвор од тој договор ја нарушува стабилноста и политиката во државата.
Највоздржан беше лидерот на ДУИ Али Ахмети, кој рече дека треба да се зголеми вниманието во која насока го загрозуваме договорот постигнат со жртви и крв, додавајќи дека политичката изјава ќе биде упатена до сите домашни институции, но и до меѓународните центри.
Меџити: Претставата заврши, дојде време да се спушти завесата
Еден од лидерите на ВЛЕН Изет Меџити преку Фејсбук статус му порача на Европскиот фронт дека претставата заврши, дојде време да се спушти завесата.
„Драмата во режија на Али Ахмети која се прикажа во Тетово е само демонстрација на страв од губење на привилегиите со кои некогаш се збогатуваа, а сега се обидуваат да го заштитат богатството создадено со наши пари, додека обичниот граѓанин едвај го врзува почетокот со крајот на месецот.
Го разбирам нивниот очај: 20 години живееја на сметка на народот и се богатеа со парите на граѓаните! Тие имаат една цел: очајно да го заштитат губењето на власта, нивните фотелји и семејни бизниси, цел камуфлирана со патриотизам и фолклоризам“, се вели во објавата на Меџити на Феjсбук, со став дека одговорност ќе има и системот ќе биде ослобен од корумпираната каста.
Алиу: Европски Фронт со говори налик на 90-тите години
Универзитетскиот професор Мурат Алиу исто така преку Фејсбук ги опиша говорите на лидерите на Европскиот фронт како говори со националистички тонови од 90-тите.
Тој вели дека Европскиот фронт ќе ја продолжи битката за прашањето за албанскиот легитимитет што го претендира .
„Тоа значи дека дискурсот за „недостиг на легитимитет“ ќе биде товар за ВЛЕН во следниот период. Во овој случај, ВЛЕН има само еден пат: со квалификуван кадар да докаже добро владеење. Во спротивно, тешко дека ќе го преживеат дискурсот каде ВЛЕН е претставен како „вазал“ на ВМРО. Од друга страна, она што ДУИ не сака да го направи е да се соочи со самата себе. Да не направи самокритика, значи да не кажува ниту еден збор за сета таа корупција и кражба се показател за нивната главна грижа“, пишува Алиу.
Во Собранието денеска ќе се одржи првата координација на претседателот на Собранието Африм Гаши со претставници на партиите, по конститутивната седница.
Собранието треба да ги донесе законските измени на новиот Закон за организација на работата на органите на државната управа и според него да се изгласа новата реорганизирана влада и да бидат избрани нејзините членови.
Исто така, и измените на Законот за локална самоуправа и Изборниот законик, за да се најде преодно решение, да не се распишуваат избори само за неколку месеци мандат односно до одржувањето на локални избори во целата држава наредната година, во оние општини каде градоначалници веќе станаа пратеници и ќе станат министри.
За измените на овие системски закони потребно е двотретинско мнозинство.
Н. Абдурахмани
