ДРАГАН МИШЕВ
На самиот ден на започнување на новата учебна година, премиерот Христијан Мицкоски се сети да најави лимитирање на цените на производите кои се неопходни за старт на учебната година, откако (се надева) ќе биде готова анализата, денес-утре, па некое утре на владина седница ќе изнесат план, па расправа по планот, па планот во акционен план, па изјава, па секако прес, па службен весник, па ќе фати празник… и отиде полугодието.
Иако вмровските тролови на социјалните мрежи продаваат ветер и магла, и овој потег во најава на невидено го претставуваат како епохален, сепак, како некако касно да му текна на премиерот на нашата земја да најавува мерки за олеснување неопходни за стартот на учебната година откако истата веќе започна, и најголем дел од родителите веќе го купиле училишниот прибор неопходен за нормално одвивање на штотуку започнатата настава во училиштата.
А и мораше да излезе со некое вакво ветување, колку да не биде без ич, додека во соседството, владите на Црна Гора и Србија преземаат мерки за заштита на граѓаните, намалување на маржите и цените на одредени поризводи во малопродажната мрежа. Само нашиот премиер, во дослух со олигарсите и бизнис заедницата како мерка во борбата со високите цени и за подобрување на стандардот на граѓаните, Мицкоски се одлучи само да упати апел до трговците максимално да ги намалат маржите на производите, но истовремено истакна дека Владата нема намера да интервенира во цените.
Ако на оваа се додаде дека истава влада нема намера годинава да ги покачи платите на работниците, наставниците, професорите… најавата за лимитирање на цените што му го сугерирале од ПР службата, останува уште еден маркетиншки трик за заблудување на широките народни маси, да држи влага кај гласачкото тело, до некој нов дефокус од сопствената неспособност.
