Нашата редакција врз основа на реакции од читатели пензионери, кои што упатија прашање што се случува со ветеното покачување од страна на владата на ВМРО-ДПМНЕ. Ветувањето од 5.000 денари, се подели на 2.500 денари во септември односно 2.500 денари во март 2025 година.
Каде настана забуната кај пензионерите?
На 27 август Министерството за социјални политики, демографија и млади соопшти дека предлог законското решение за изменување и дополнување на Законот за пензиското и инвалидското осигурување ја помина владината процедура наскоро ќе се најде во собраниска процедура.
„Со Предлогот на Законот за изменување и дополнување на Законот за пензиското и инвалидското осигурување, се предлага зголемување на пензиите на 1 септември 2024 година и 1 март 2025 година. Поконкретно, на 1 септември 2024 година, сите видови на пензии остварени согласно овој закон заклучно со 31 август 2024 година, се зголемуваат за 2.500 денари и на 1 март 2025 година, сите видови на пензии остварени согласно со овој закон заклучно со 28 февруари 2025 година, се зголемуваат за 2.500 денари.“, соопштија од Министерството.
Според реакциите на пензионерите, ваквото образложение што го прочитале по медиуми, ним им кажува дека на 1 септември со августовската пензија ќе имаат покачување од 2.500 денари. Пензиите легнаа, но покачувањето не.
ЦивилМедиа прати прашање до Фондот за пензиско и инвалидско осигурување (ПИОМ) кога точно може да се очекува покачувањето на пензиите.
Прашање до ПИОСМ: Кога пензионерите може да го очекуваат покачувањето и што ја предизвикало забуната кај нив за да го очекуваат покачувањето со августовската пензија?
„Почитувани, во одговор на вашиот мејл, ве известуваме дека во тек е постапка за изменување и дополнување на Законот за ПИО кој се однесува на линеарното покачување на пензии. По завршување на постапката и донесување на измената на Законот во Собрание на РСМ ќе може со сигурност да одговориме на мејлот. Имајќи го во предвид законското решение и праксата во работењето на Фондот на ПИОСМ линеарното покачување би се очекувало да биде во октомври месец“, одговорија од Фондот.
Според одговорот на ПИОМ може да се заклучи дека линеарното покачување би се очекувало во октомври, заедно со септемвриската пензија. Сепак, тоа се основа на нивната пракса и досегашното работење, но не можат со сигурност да гарантираат дека така ќе биде. Поточно, одлуката зависи од кога Предлог законот ќе се постави на дневен ред во Собранието и кога ќе биде изгласан од пратениците.
Ариан Мехмети
