ДРАГАН МИШЕВ
Од доаѓањето на ВМРО – ДПМНЕ на власт, како да стана практика македонските високи државни функционери при посетата на странски држави да бидат пречекувани без да се истакне македонското државно знаме.
И додека за последното неистакнување на македонскот знаме во Бугарија при посетата на претседателката Гордана Сиљановска Давкова и државната делегација во која беа и министерот за надворешни работи, Тимчо Муцунски, како и министерот за култура Зоран Љутков, се дигна голема галама во јавноста, зачудувачки незабелижително помина истата скандалозна ситуација што се случи на 29 август при посетата на премиерот Христијан Мицкоски на Хрватска.
Заедно со Мицкоски во Хрватска беше и државната делегацијата во состав: министерка за образование, Весна Јаневска, министерот за здравство, Арбен Таравари, и истиот министер што беше и на средбата во Бугарија, неизбежниот Тимчо Муцунски, кој е можеби и најодговорен за овие дипломатски скандали.
При официјалната посета на македонскиот премиер, Христијан Мицкоски на Хрватска, на средбата со претседателот на земјата Зоран Милановиќ на објавените фотографии се гледа дека Македонскиот премиер и хрватскиот претседател се ракуваат додека во позадина се истакнати само знамињата на домаќинот Хрватска и знамето на ЕУ.
И додека премиерот Христијан Мицкоски, три дена по настанот, пост фестум изјавува пред домашната јавност дека ќе му биде врачена протестна нота на бугарскиот амбасадор во земјава поради неистакнувањето на македонското знаме на средбата на претседателката на државата Гордана Сиљановска-Давкова со бугарскиот претседател Румен Радев при нејзината посета на Софија, забележително е отсуство на реакција за неистакнувањето на македонското знаме при неговата средба со Милановиќ во Загреб, и од страна на премиерот, и од страна на медиумите, и од страна на јавноста.
– Во минатото кога се понижуваше и распродаваше македонското достоинство, тогаш се молчеше, се виткаше кичмата и се согласуваа со тие што не понижуваа и газеа. Сега се решаваат работите на овој начин, дипломатски, се испраќаат протесни ноти и нема повеќе да имаме меѓународна политика ниту дипломатска со свиткана кичма. Тогаш кога ќе се помине рубиконот, кога ќе се помине црвената линија, тогаш треба и да се реагира. Затоа што вие ако не реагирате, тој исклучок потоа ќе стане пракса, ќе рече денес Мицкоски, одговарајќи на поставените новинарски прашања .
Но некои прашања останаа непоставени. На кое минато мисли Мицкоски кога вели дека се понижуваше, распродаваше, газеше македонското достоинство, тогаш се молчеше, се виткаше кичмата. На ова од август каде што е тој самиот фатен во невавидна положба, и потоа ја одмолче?
И кои се тие двојни аршини за еден ист настан, само во зависност од тоа дали доаѓаат од исток или од запад? Зошто медиумите и јавноста не реагираа тогаш на настаните во Хрватска, како што реагираат сега за истото во Бугарија? Има ли некоја скриена позадина, особено ако се има предвид дека голем дел од медиумите, а и од јавноста работат и реагираат „под диктат“ од владејачката партија?
Ќе собере ли сили Мицкоски да одговори и на овие новинарски прашања?
Текстот е личен став на авторот
