ДРАГАН МИШЕВ
Свечено, со низа активности денеска на УКИМ во Скопје ќе биде одбележан 17 Ноември – Меѓународниот ден на студентите. Настанот ќе го удостојат со пригодни обраќања и претседателката Гордана Сиљановска Давкова и премиерот Христијан Мицкоски, а обраќања ќе има и министерката за образование и наука Весна Јаневска.
И секако, не изостана соопштението од Центар за комуникации на владејачката ВМРО -ДПМНЕ, кое не отстапува од веќе видените „ЌЕ“ соопштенија дека владата предводена од ВМРО-ДПМНЕ „ЌЕ“ го зголемува Студентскиот стандард, и дека врвен приоритет на Владата на ВМРО-ДПМНЕ се младите и образованието, а тоа „ЌЕ“ се зголемува секоја година. Само не оваа. Издржете само уште оваа година. Од наредната „ЌЕ“ тече мед и млеко.
Во меѓувреме, студентите на Универзитетот „Св. Кирил и Методиј“ (УКИМ) во Скопје од оваа академска година се соочија со зголемени дополнителни давачки покрај партиципацијата, односно школарината за студирање. Па така, од овој зимски семестар, во насоките за упис, студентите забележале нови трошоци кои треба да ги уплатат на сметката на факултетите. Зголемувањето на сумите некаде се движи и до 1.500 денари повеќе од она што се плаќало до минатата академска година.
Ни „криви ни должни“, ниту известени, во новата академска година студентите плаќаа дури за 5.000 денари поскапа академската година, преку двете нови самоволно донесени уплатници: „Набавка на on-line ресурси за реализација на студиските програми“ и „Набавка на материјални ресурси за реализација на студиските програми“. Никој од горенаведените говорници на денот на студентите, но ниту од самите студентски здруженија, кои треба да ги застапуваат студентите, не се огласија по нововоспоставената давачка на грбот на студентите.
Забележително е и отсуство на реакција за висината на надоместокот за студентски оброк, зацементиран во висина од 140 денари на ден, средства недоволни за пристојно да се прехрани еден студент, во услови кога цените на храната и пијалоците во малопродажба вртоглаво расне. Според статистика, цената на зеленчукот се зголемила за 47.7 отсто, а цените од поодамна ги крена и студентското бифе, по 20/30 денари на еден оброк. Дури и полигонот за обука на возачи, доколку некој студенти сакаат да полагаат за возачка, е качен од 200 на 250 денари. Само сумата за субвенционираниот студентски оброк остана иста, 140 денари. Бурек и јогурт. Еднаш на ден.
Сега студентите и студентските здруженија и организации „ќутат“. Никако да се одважат и организирано да кренат глас, да излезат на протест во одбрана на своите студентски права, за подобар животен и студентски стандард, како што во ноември 2022 година, по протестите на студентите, откако претседателите на сите Универзитетски собранија се договорија за заеднички настап и преку договор со тогашната власт успеаја да издејствуваат студентскиот оброк да се покачи за 20 денари, од 120 на 140 денари.
Со доаѓањето на власт н ВМРО – ДПМНЕ како да замреа сите активности, акции, протести, дебати во насока на остварување на студентските барања.
Кој ги замолча студентите, кои пред само 10 години со својот активизам и слободоумност беа движечка сила во (заробеното) општество.
