Претседателот на ЦИВИЛ и главен уредник на медиумската платформа на организацијата, Џабир Дерала, во интервју за Слободен печат, меѓу другото, изјави дека палењето на знаме на една држава, која и да е, нема ништо достоинствено. Тоа, според Дерала е неприфатливо однесување и вандалски чин.
„Сметам дека е за крајна осуда таквото однесување. Во палењето знаме нема ништо достоинствено. Вие, ако на ден на знаме на една нација палите знаме на држава која било, а уште пострашно во овој случај, државата во која вие живеете, тоа значи дека вие не го почитувате ниту своето знаме“, изјави Дерала за Слободен печат.
Според него, се работи за експлоатација на младите и децата кои се таргет на деструктивни и токсични пораки од политичките чинители – тие се вистински одговорни за инцидентите.
Длабоко вознемирувачки е да се биде сведок на вакви инциденти, но уште посериозно е тоа што се врши експлоатација на младите за ширење на деструктивни идеологии и пораки кои ги упатуваат пред сè политичките ентитети во земјава кои се вистински одговорни за настанот – посочи првиот човек на ЦИВИЛ Дерала и дополнува дека постои Закон по кој за одредената возраст треба да дејствува и да се санкционира одреденото поведение.
Претседателот на ЦИВИЛ, Дерала, како што објави Слободен печат, ги повикува сите одговорни институции, лидерите во заедниците, но и родителите, просветните работници, граѓанските организации и сите одговорни и достоинствени луѓе да преземат итни мерки за промовирање на толеранцијата и да преземат итни чекори за интензивна едукација против омразата по која било основа.
Извор: Слободен печат
