Доналд Трамп повторно трола… или не? Новоизбраниот претседател на САД продолжува да го исмева канадскиот премиер Џастин Трудо.
Како што пренесува Политико.еу, рано во средата, Доналд Трамп предложи Канада да се претвори во дел од САД, нарекувајќи го „одлична идеја“.
„Никој не може да одговори зошто ја субвенционираме Канада во износ од над 100.000.000 долари годишно? Нема смисла! Многу Канаѓани сакаат Канада да стане 51-та држава. Масовно би заштедиле на даноци и воена заштита. Мислам дека е одлична идеја. 51 држава!!!” објави Трамп на својата платформа на социјалните мрежи truthsocial.
Не е прв пат во последниве денови Трамп да и’ се нафрли на владата на Канада и премиерот Џастин Трудо, која беше потресена од шокантната оставка на министерката за финансии Кристија Фриланд.
„Големата држава Канада е вчудоневидена бидејќи министерката за финансии поднесе оставка или беше разрешена од нејзината функција од гувернерот Џастин Трудо“, напиша Трамп во понеделникот. „Нејзиното однесување беше целосно токсично и воопшто не придонесуваше за склучување зделки кои се добри за многу несреќните граѓани на Канада. Таа нема да пропушти!!!!”
Исмејувачките натписи доаѓаат во услови на тензии меѓу двете земји откако Трамп се закани дека ќе воведе царини од 25 отсто за канадски стоки и ја обвини канадската влада дека не ги решила трговските и имиграциските прашања.
По средбата со Трудо во неговото одморалиште Мар-а-Лаго на Флорида кон крајот на ноември, Трамп почна да го нарекува Трудо „гувернер“ на „Големата држава Канада“.
„Беше задоволство да вечераме пред некоја вечер со гувернерот Џастин Трудо од Големата држава Канада“, напиша тој. „Со нетрпение очекувам наскоро повторно да го видам гувернерот за да ги продолжиме нашите длабински разговори за тарифите и трговијата, чии резултати ќе бидат навистина спектакуларни за сите! DJT.”
Според The Economic times, забелешките ја прошируваат долгогодишната шема на Трамп на шега да сугерира дека Канада би можела да стане дел од Соединетите Држави, идеја што тој првпат ја изнесе за време на неформалниот разговор на вечерата за Денот на благодарноста со Трудо пред неколку години. Сепак, овој пат, тонот се смени, бидејќи Трудо се бори да ги задржи последиците по шокантната оставка на Фриленд.
Контекстот зад тврдењата на Трамп за бројката од 100 милиони долари американски субвенции за Канада нема јасна основа. Претходно, тој наведе бројки до 100 милијарди долари кога разговараше за трговските односи меѓу САД и Канада. Според податоците од американскиот попис, трговскиот дефицит на стоки со Канада заклучно со октомври 2023 година изнесувал 50,5 милијарди долари, и 64,3 милијарди долари за претходната година. Трамп често го критикуваше трговскиот дисбаланс, вклучително и објава од 2018 година во која се тврди дека Канада заработува „речиси 100 милијарди долари во трговијата со САД“.
Драган Мишев
