Отчетност, транспарентност, отвореност на институциите, соработката со граѓаните, имплементирањето на алатки од комуникациската технологија за подобра комуникација со граѓаните при носење закони и при имплементирање на политики и борба со корупцијата…, се ургентни принципи за младите во регионот. Ова е заклучокот на денешната финална конференција на тема „Патот кон добро владеење”, во рамки на проектот „АКТИОН Вишеград СЕЕ – Одговорност, технологија и мрежа на институционална отвореност во Југоисточна Европа“, што го имплементира Фондацијата „Метаморфозис“, во соработка со седум партнери од регионот.
Како гости говорници на денешната конференција присуствуваа амбасадорката на Германија во Македонија, д-р Кристине Д. Алтхаузер, амбасадорот на Полска, Јацек Мултановски, како и претставници на партнерите во проектот од државите од Вишеградската група – Чешка, Словачка, Унгарија и Полска, и претставници на партнерските граѓански организации од земјите од Балканот: Македонија, Црна Гора, Србија и Босна и Херцеговина.
Целта на АКТИОН проектот е промоција на динамично граѓанско општество кое ефикасно ги мобилизира граѓаните, а со цел – нивно активно ангажирање за прашања поврзани со доброто владеење во контекст на пристап кон ЕУ, а кое влијае врз политиките и процесот на донесување на одлуки, како на национално, така и на регионално ниво во Западниот Балкан.
„Заклучокот е дека доброто владеење, всушност, ако се имплементираат принципите на доброто владеење како што треба, неизбежно генерира подобрување на животниот стандард во земјите каде што се имплементираат. Еден од најдобрите начини за имплементирање на овие принципи е евроинтеграција на земјата. И, преку евроинтеграцијата, во самиот процес на приближување и станување членка на Европската унија, земјата неизбежно мора да ги имплементира принципите на доброто владеење, а со тоа да го подобри и квалитетот на животот“, вели за ЦИВИЛ Медиа, Горан Ризаов, проект менаџер во „Метаморфозис“
На конференијата ќе се одржат две панел-дискусии: „Добри практики од регионот на Вишеградската група и од Балканот“ и „Достапност на податоци и истражувања за доброто владеење“, а беше најавена и промоција на roadmap за имплементација на принципите на доброто владеење во земјите од Западен Балкан – „Патот кон добро владеење“.
Текст и фото: Дехран Муратов
