За жал состојбите во МО и Армијата покажуваат дека процесите на модернизација заостануваат и освен тоа што буџетот е зголемен на хартија, многу од проектите за модернизација се одложуваат без објаснување. Ова се однесува и на набавките, и на законските предлози, изјави за ЦивилМедиа Славјанка Петровска, пратеничка на СДСМ и поранешна министерка за одбрана. Таа одговори на барањето од ЦивилМедиа за коментар на соопштението на Министерство за одбрана во кое се тврди дека нема застој во процесот на модернизација на Армијата.
Петровска потсетува на неколку критични процеси што се започнати за време на нејзиниот мандат како прв човек на одбраната, но кои сега се стопирани.
„На пример, предлог Законот за критична инфраструктура е клучен закон кој го подготви експертска работна група со поддршка на експерт на ЕУ и пред изборите беше во владина процедура. Но, после 8 месеци сѐ уште не е донесен. Или пак пакетот на закони за реформата на системот за управување со кризи, проект кој беше завршен и треба да се имплементира преку законски измени“, изјави Петровска за ЦивилМедиа.
Поранешната министерка за одбрана изрази загриженост и поради намерното проблематизирање на постапката за ремонт на хеликоптерите.
„Ме загрижува и фактот што ремонтот на хеликоптерите кои беа испратени во Чешката компанија Лом Прага намерно бил проблематизиран, заради што леталата не беа донесени во државата во јули и за жал не можеа да учествуваат во гаснењето на пожарите“, критикува Петровска.
Нашата соговорничка открива и дека, наводно, се подготвува и намалувањето на правата од работен однос што, според неа, би било скандалозно.
„Особено сум загрижена заради некои информации кои до мене стигнаа од членови на синдикатот кои велат дека се подготвувало намалување на правата од работен однос што за мене би било скандалозно“, предупреди Петровска.
Тоа за неа не е изненадување, бидејќи ВМРО-ДПМНЕ како опозиција го бојкотираше донесувањето на Законот за вработени во одбраната.
„Ако се земе предвид дека ВМРО-ДПМНЕ како опозиција го бојкотираше донесувањето на Законот за вработени во одбраната и лично мене ме критикуваа за потпишаниот Колективен договор, сосема очекувано е дека ваквите информации се вистина“, потсетува Петровска.
Наместо подобрување на статусот на вработените во одбраната, открива Петровска, се потпишуваат решенија според кои луѓето се делата на партиски подобни и неподобни.
„Со задоцнување од 7 месеци е донесена новата Систематизација на работни места и потпишани се нови решенија за распоредување со кои е направена поделба на партиски подобни и неподобни“, критикува Петровска.
Што се однесува до правичната застапеност, поранешната министерка за одбрана тврди дека мултиетничноста во ресорот одбрана се руши.
„За жал, кохезијата, единството и мултиетничноста што изминатите 7 години се градеше сега веќе се руши. Стравувам дека на подолг рок ова ќе се одрази и на квалитетот на работата и мотивираноста на вработените“, изјави Петровска за ЦивилМедиа.
Џ. Д.
