Шефот на Руската Федерација, Владимир Путин, во четвртокот рече дека се согласува со американските предлози за прекин на огнот во Украина, но дека секој прекин на огнот ќе мора да се занимава со основните причини за конфликтот и дека треба да се решат многу детали, објави Телевизија Полска.
Шефот на државата агресор која во 2014 година окупираше делови од Украина, а во 2022 година тргна во целосна воена инвазија со 170-190 илјади војници, вели дека сака да се занимава со причините за „конфликтот“.
„Се согласуваме со предлозите за прекин на непријателствата“, им рече Путин на новинарите на прес-конференција во Кремљ по разговорите со белорускиот претседател Александар Лукашенко.
„Но, ние тргнуваме од фактот дека овој прекин треба да биде таков што ќе доведе до долгорочен мир и ќе ги елиминира првичните причини за оваа криза“, вели Путин, целосно игнорирајќи го фактот дека Русија е земја агресор, а тој самиот е баран од Меѓународниот кривичен суд за воени злосторства.
Американскиот претседател Доналд Трамп во средата во Белата куќа рече дека се надева дека Кремљ ќе се согласи со предлогот на САД за 30-дневен прекин на огнот што Украина рече дека ќе го поддржи.
Украинските власти се согласија на 30-дневен прекин на огнот на средбата со високата американска делегација во Саудиска Арабија во вторникот, како резултат на што Вашингтон се согласи повторно да воспостави воена помош и размена на разузнавачки информации со Кијив.
Путин му се заблагодари на Трамп за неговите напори да стави крај на војната. „Самата идеја е коректна и ние секако ја поддржуваме“, рече тој. „Но, има прашања за кои треба да разговараме. И мислам дека треба да разговараме и со нашите американски колеги“.
Путин рече дека можеби ќе му се јави на Трамп за да разговара за ова прашање. „Ја поддржуваме идејата за завршување на овој конфликт со мирни средства“, повтори тој.
Путин во средата облече зелена маскирна униформа за да го посети командниот пункт во областа Курск во западна Русија, каде што Украина навлезе со своите сили на 6 август минатата година, а сега е мета на силна офанзива од руските сили помогнати со војници од Северна Кореја.
М. Д.
