Најголемата студентска заедница во Македонија – Студентарија, од денеска е под напад на про-владини ботови и апологети, објави студентарија.мк на својот канал за комуникација на Инстаграм.
Додека младите тагуваат, додека целата држава е во шок поради смртта на најмалку 60 згаснати млади животи во трагедија каква што не паметиме, некои, во страв од ескалација на револтот, избраа да ја покажат најдолната бесчувствителност во обид да си ги спасат фотелјите.
Наместо признавање на вина и одговорност, од вечерва сме сведоци на лаги, напади и валкани игри против Студентарија.
View this post on Instagram
Денес, како и секогаш, Студентарија беше таму каде што треба – на страната на студентите. Го следевме и го пренесовме студентскиот собир и протест, бидејќи нашата мисија е јасна: да информираме, да го пренесеме гласот на младите и да бидеме платформа што се бори за студентските права и подобар живот.
Денес на платото на УКИМ се случи инцидент кој Студентарија одлучи да го пренесе и објави, што очигледно не им одговара на владејачките елити.
За време на говорот на министерката за образование и наука Весна Јаневска, повеќе студенти побараа лекарска помош откако на нивни колеги им се слошило. Министерката продолжи да говори, по што огромната маса студенти почна со свиркање и барање тишина за да им се помогне на оние со влошена здравствена состојба.
Меѓу извиците и свирежите се слушнаа повици собирот да не се политизира (поради присуството на Јаневска), а дел од студентите извикуваа и ,,Оставка”.
Студентарија го документираше настанот и беше првиот медиум кој објави за инцидентот, затоа што сметаме дека јавноста и младите имаат право да знаат што се случуваше.
Двете видеа од денешниот протест објавени на нашиот профил, заедно бројат над 1,2 милиони прегледи. На видеата се гледа огромна маса од најмалку 3.000 изреволтирани млади луѓе.
По објавата на видеата и нивната виралност, а поради стравот што владејачката ВМРО-ДПМНЕ го има од младите со оглед на ситуацијата во Србија (стравот истото да не се прелее и во Македонија), про-владини и про-вмровски ботови одлучија да го насочат ударот кон Студентарија.
Во страв од засилување на протестите кои започнаа денеска, а се најавени и за наредниов период, про-владините ботови се обидуваат да го минимизираат револтот и подготвеноста на младите да се изборат за најважното – правдата.
Од вечерва, бројни профили и страници организирано шират лаги дека организатор на протестите кои се закажани за утре во повеќе градови низ земјата, е Гоше Николов, основач на Студентарија.
Меѓу лажните објави, се бара притвор(?) за основачот на Студентарија, а се повикува и на насилство кон него.
Идејата зад ваквите лаги кои ги споделуваат десетици сомнителни страници на социјалните мрежи ,,X” и ,,Фејсбук” (голем број од нив го носат името на ВМРО-ДПМНЕ) веројатно е да се претстави лажна слика дека Студентарија има некакви задни намери и е поврзана со одредени политички партии.
Најостро демантираме каква била поврзаност со организацијата на утрешните протести низ земјава. Ниту Студентарија, ниту нејзиниот основач Гоше Николов се дел од иницијативи кои наводно подготвуваат протести периодов.
Она што ја плаши власта е што Студентарија, која е еден од најпопуларните и највлијателни канали меѓу македонската младина, активно ги споделува повиците за граѓански протести изминатиов период (против загадениот воздух, по смртта на Фросина, а сега и трагедијата во Кочани).
Студентарија постои повеќе од 7 години и оние кои се со нас од самите почетоци знаат:
Студентарија не е партиска алатка, ниту е нечиј послужник. Не била, ниту некогаш ќе биде. Студентарија е гласот на младите и нема да запреме,особено не кога насилно се обидувате да нè замолчите!
За да бесчовечноста на про-владините ботови биде поголема, Гоше Николов е од Кочани и во вчерашниот пожар, како и сите други, загуби многу пријатели и познаници.
Среде оваа трагедија, партиските апологети, наместо да покажат трошка човечност, избраа да водат хајка, да манипулираат и да лажат. Нехумано. Нечовечно. Срамно.
Пораката е следна: Колку и да се обидувате да го задушите гласот на младите, само го правите погласен. Не се плашиме. Не забораваме. Не замолчуваме. Колку повеќе нè напаѓате – толку погласни ќе станеме, се вели во објавата на Студентарија, најголемата студентска заедница
Д. Мишев
