„ЦИВИЛ – Центар за слобода со години се соочува со жестоки притисоци и црна кампања кои имаат цел да ја скријат вистината за тешката состојба со човековите права, за кои известува организацијата во континуитет, со години наназад. Ова е обраќање до сите кои со своето дејствување се обидуваат да му наштетат на угледот и на длабоката доверба која ЦИВИЛ ја ужива од целокупната јавност, од сите граѓанки и граѓани на Република Македонија. Денеска им се обраќаме директно и јавно, не затоа што овие факти и ставови не се познати, туку за и нив да ги потсетиме – дека нема да ги заборавиме нивните недела против демократијата и човековите права и против достоинството на огромен број луѓе во нашата земја“, се вели во денешното соопштение на ЦИВИЛ.
ЦИВИЛ ја осудува секоја постапка на кршење на законите и на Уставот, секаков вид на говор на омраза, лага и клевета, без оглед на тоа дали се работи за претседателот на Македонија, било кој лидер на партија или медиум: „Тоа сме го докажале многупати досега и ќе продолжиме на тој начин. Тоа се однесува и на секој што има релација со ЦИВИЛ, без оглед на тоа дали е раководител, член, соработник, поддржувач или набљудувач“.
„Сите се еднакви пред законот. Сите се третираат подеднакво и според Статутот и Кодексот на ЦИВИЛ. Тоа го знаат сите граѓанки и граѓани на Македонија, дури и оние за кои мислите дека сте ги убедиле во лагите кои треба да ги одбранат вашите газди. Пренесете им на вашите газди дека нема да дозволиме да го одвлечат вниманието од одговорноста за корупцијата, изборната измама и за суровоста со која владееја 11 години. Нема да ви успее да ги тргнете очите на јавноста од сето зло во кое учествувавте како верни пци!“, се вели во соопштението кое е своевиден проглас на ЦИВИЛ до јавноста.
„Допрва ќе го жнеете тоа што сте го посеале! Допрва ќе видите што предизвикавте со своето неодговорно, непресметливо и злобно однесување. Вие сте олицетворение на говорот на омраза и на црната пропаганда. Ние ќе ви возвратиме со вистина, професионализам, објективност, но и со силата на законот. На заштитата што ја имавте долги години од контролираното судство ѝ се бројат деновите“, категорично се порачува во соопштението на ЦИВИЛ.
