Жителите на скопската општина Аеродром не попуштаат, ако градоначалникот Ивица Коневски не ја повлече одлуката за спорниот ДУП, ќе се жалат на Уставниот суд.
Не стивнуваат реакциите на аеродромци против изгласувањето на промените на Деталниот урбанистички план, според кои, огромни зелени површини ќе се претворат во градилишта за висококатници. Незадоволните граѓани вчера, повторно излегоа на протест против ваквата одлука на Општината.
Златко Марин, претседател на општинска организација на СДСМ – Аеродром, во изјава за ЦИВИЛ Медиа, реагира на ставот на градоначалникот Коневски постиран на Фејсбук.
„Единственото што го чувме од Ивица Коневски е изјавата која ја даде во паника, криејќи се зад ФБ постовите на Општина Аеродром, а во обид да ја дефокусира јавноста. Вели дека тој работел во корист на граѓаните, а ние сме ширеле дезинформации. Да те прашам, Коневски, дали висококатниците кои го задушуваат Аеродром се во корист на граѓаните? Граѓаните рекоа ‘не’ за зградите кај ‘Мајчин дом’ и покрај Вардар, уште првпат кога ДУП-от беше даден на јавна расправа. Освен што ја игнорира волјата на граѓаните, Коневски ја навредува и нивната интелигенција! Каде се тие 50 илјади садници за кои тврди дека ги има посадено?! Доволно е да еднаш да се помине низ Аеродром, за да стане јасно дека тоа не е вистина“, ни изјави Марин.
Тој ја коментира и нетранспарентноста на целата постапка на изгласување на спорниот урбанистички план.
„За дополнителна точка да се стави на седница, треба да се образложи итноста која ја покренува. Тука се поставува прашањето: зошто ДУП толку итно треба да се донесе? За да се заштитат бизнис-интересите на Камчев и на вмровската елита? Како е ова во корист на граѓаните? Ајде, градоначалникот нека излезе и нека ѝ каже и на јавноста – во чија сопственост е земјиштето кај ‘Мајчин дом’! Зошто е толку неопходно скришум да се дозволи изградба на висококатница тука? Висококатница која ќе ѝ донесе само штета на веќе пренаселената населба“, дециден е Марин.
Тој вели дека граѓаните јасно се изразиле дека им е смачено да дишат отров, наместо кислород, како и дека ако парцелата е приватно земјиште, не значи дека тука треба да се дозволи градба.
„Општината има одговорност да работи за доброто на широката маса, а не за потребите на индивидуалци. Градби, како што се планирани кај ‘Мајчин дом’ и покрај Вардар, ќе го втурнат Аеродром во еколошка катастрофа. Ова Коневски упорно заборава да го спомне во своите кукавички излагања. Вели дека целта му е да го урбанизира делот кој не е урбанизиран. Ние не сме против тоа. Меѓутоа, плански и имајќи ги на ум потребите на населбата. Не смееме да ѝ дозволиме на урбаната мафија да го уништи нашиот Аеродром, и да ги задуши неговите граѓани. Бараме итно повлекување на ДУПИ10. Бараме Ивица Коневски да ги слушне криците на своите граѓани!“, истакна Марин.
Маја Ивановска
