Хамас, забранета терористичка група во САД, Велика Британија и ЕУ, потврди дека нема да се согласи да се разоружа доколку не се воспостави суверена палестинска држава, како одговор на едно од клучните барања на Израел во разговорите за прекин на огнот во Газа.
Како што пренесува Би-би-си, палестинската вооружена група соопшти дека одговара на забелешките што му ги припишува на претставникот на американскиот претседател Доналд Трамп за Блискиот Исток, Стив Виткоф, дека Хамас „изразил подготвеност“ да го положи оружјето.
Израел смета дека разоружувањето на Хамас е еден од неколкуте клучни услови за каков било договор за прекин на конфликтот.
Индиректните преговори меѓу Израел и Хамас за обезбедување прекин на огнот и ослободување на заложниците беа во застој минатата недела.
Во изминатите неколку дена, арапските влади го повикаа Хамас да се разоружа и да ја предаде контролата врз Газа, откако голем број западни земји – вклучувајќи ги Франција и Канада – објавија планови за признавање на државата Палестина. Велика Британија изјави дека ќе го стори тоа ако Израел не исполни одредени услови до септември.
Хамас во својата изјава наведува дека не може да се откаже од своето право на „отпор и своето оружје“ освен ако не се воспостави „независна, целосно суверена палестинска држава со Ерусалим како главен град“.
Генерал-потполковник Ејал Замир од Израелските одбранбени сили (ИДФ) во петокот предупреди дека нема да има одмор во борбите во Газа ако преговорите не успеат брзо да обезбедат ослободување на заложниците што ги држи Хамас.
А во саботата, семејството на заложникот Евјатар Давид издаде соопштение откако Хамас објави видео на кое го прикажува без маица и ослабен во слабо осветлен тунел.
Тие го обвинија Хамас дека го изгладнува како дел од пропагандна кампања и апелираа до израелската влада и САД да сторат сè што е можно за да го спасат.
Виткоф е во посета на Израел додека владата на премиерот Бенјамин Нетанјаху се соочува со зголемен притисок поради влошувањето на хуманитарните услови во Газа.
Агенциите на ОН предупредија дека има масовен глад предизвикан од човекот во Газа и го обвинија Израел, кој го контролира влезот на сите залихи на територијата. Израел инсистираше дека нема ограничувања за испорака на помош и дека „нема гладување“.
Порано во саботата, Виткоф се сретна во Тел Авив со семејствата на израелските заложници кои сè уште се во Газа.
Снимките објавени на интернет покажаа како преговарачот од Вашингтон е пречекан со аплауз и молби за помош од поддржувачите на семејствата на заложниците кога пристигна на плоштадот кој стана познат по протестите.
Виткоф рече дека мировните напори треба да се фокусираат на прекинување на конфликтот и враќање на сите заложници дома, наместо на она што го нарече делумен договор.
Како дел од патувањето на Виткоф, тој се сретна со Нетанјаху во четврток, а во петок изврши инспекција на широко критикувана локација за помош во јужна Газа.
Најновите бројки од Обединетите нации велат дека најмалку 1.373 Палестинци се убиени барајќи храна од крајот на мај.
Мнозинството се убиени од израелската војска во близина на дистрибутивните локации на израелската и поддржаната од САД Хуманитарна Фондација за Газа (GHF), велат од ОН.
Израел го обвини Хамас за поттикнување хаос во близина на локациите и вели дека неговите војници не отвораат намерно оган врз цивили.
Според Министерството за здравство на територијата, управувано од Хамас, повеќе од 60.000 луѓе оттогаш се убиени во Газа, а 169 луѓе, вклучувајќи 93 деца, починале од неухранетост, откако израелската војска започна кампања во Газа како одговор на нападот предводен од Хамас врз јужен Израел на 7 октомври 2023 година, во кој беа убиени околу 1.200 луѓе, а 251 други беа земени како заложници.
Д. Мишев
