Разговорите меѓу претседателот Володимир Зеленски и рускиот претседател Владимир Путин би можеле да се одржат во Унгарија, објави Ројтерс на 19 август повикувајќи се на извор од американската администрација, пренесува Кијив Индипендент.
Средбата би била прва од таков вид меѓу Зеленски и Путин од почетокот на целосната инвазија на Русија во февруари 2022 година. Двајцата лидери последен пат се сретнаа во Париз во декември 2019 година како дел од разговорите од Нормандискиот формат со посредство на Франција и Германија.
Во април, унгарскиот парламент гласаше за одобрување на повлекувањето на земјата од Меѓународниот кривичен суд (МКС), што потенцијално му овозможува на Путин да ја посети земјата и покрај потерницата издадена во 2023 година поради киднапирањето на украински деца.
Унгарскиот премиер Виктор Орбан, чија влада е широко оценета како авторитарна, ја блокираше или одложуваше воената помош за Украина, одржува врски со Путин и ги повторува наративите на Кремљ.
Американскиот претседател Доналд Трамп на 18 август, по состанокот со Зеленски и европските сојузници, изјави дека се во тек подготовки за самит лице в лице. Германскиот канцелар Фридрих Мерц, кој се придружи на разговорите, рече дека состанокот би можел да се одржи во рок од две недели.
Руските власти сè уште официјално не објавија дека се согласиле на таков состанок.
Францускиот претседател Емануел Макрон, кој исто така беше присутен за време на разговорите во Белата куќа, на 19 август изјави дека самитот треба да се одржи во Европа, додавајќи дека тој ја претпочита Женева како неутрално место.
„Ќе биде неутрална земја, па можеби Швајцарија, јас се залагам за Женева или друга земја. Последниот пат кога имаше билатерални дискусии беше во Истанбул“, изјави Макрон за францускиот радиодифузер LCI.
Долгогодишната неутралност на Швајцарија ја направи претпочитан домаќин за меѓународни преговори, каде што страните можат да се сретнат без перцепција за пристрасност.
Турскиот претседател Реџеп Таип Ердоган, исто така, ја предложи Турција како можно место во јули. Украинските и руските делегации претходно одржаа три рунди директни мировни разговори во земјата.
Зеленски постојано изразуваше подготвеност за директни преговори. На 18 август, тој изјави дека е подготвен лично да разговара за територијалните прашања со Путин.
Рускиот претседател досега избегнуваше средба со Зеленски и покрај тоа што тврдеше дека е отворен за разговори.
Д. Мишев
