Откако Народното собрание на Република Српска (НАРС) донесе одлука за распишување референдум за пресудата на Судот на Босна и Херцеговина со која на поранешниот претседател на РС Милорад Додик му беше одземен мандатот, реагираше и Делегацијата на Европската Унија (ЕУ) во БиХ.
„Пресудата на Судот на Босна и Херцеговина во случајот против Милорад Додик е конечна и обврзувачка и мора да се почитува. Подложувањето на судската одлука на јавно гласање е спротивно на владеењето на правото и независноста на судските органи“, изјави ЕУ во БиХ, пренесе Радио Слободна Европа.
Европската Унија очекува властите на РС да се воздржат од понатамошно провоцирање на кризи и дестабилизација и да дејствуваат во согласност со Уставот и законите на Босна и Херцеговина.
„Очекуваме властите на РС да ја деескалираат ситуацијата и да го почитуваат суверенитетот, територијалниот интегритет и уставниот и правен поредок на Босна и Херцеговина“, заклучи ЕУ.
Доцна навечер на 22 август, Народното собрание на РС донесе одлука за одржување референдум на кој граѓаните на тој ентитет ќе го искажат своето мислење за пресудата на Судот на Босна и Херцеговина против Милорад Додик и одлуката на Централната изборна комисија на Босна и Херцеговина со која му се одзеде мандатот како претседател на РС.
Референдумот е закажан за 25 октомври, а референдумското прашање е:
„Дали ги прифаќате одлуките на неизбраниот странец Кристијан Шмит и неуставната пресуда на Судот на Босна и Херцеговина против претседателот на РС, како и одлуката на Централната изборна комисија за одземање на мандатот на претседателот на РС, Милорад Додик?“
Одлуката за референдум не е во согласност со Уставот на Босна и Херцеговина, кој не предвидува можност субјектите самостојно да распишуваат референдуми за одлуки на државните институции.
Во исто време, по итна постапка беа усвоени измени на Законот за референдум и граѓанска иницијатива, кои овозможуваат формирање на посебни комисии за спроведување на референдумот.
На почетокот на август, Судот на Босна и Херцеговина донесе конечна пресуда со која Додик беше осуден на една година затвор (тој ја купи казната со плаќање во готово) и шестгодишна забрана за вршење јавна функција.
Потоа, ЦИК на БиХ му го одзеде мандатот на Додик, оставајќи го ентитетот без претседател и премиер, со оглед на тоа што Радован Вишковиќ поднесе оставка.
извор: РСЕ
