Хуманитарната помош од 1.200 тони, што пред нешто помалку од 20 дена тргна по морски пат, со брод, од кипарското пристаниште во Лимасол, пристигна во Газа, јави дописничката на МИА од Атина.
Од Министерството за надворешни работи на Кипар преку Икс информираа дека хуманитарната помош пристигна во координација со КОГАТ, односно израелската служба при Министерството за одбрана, надлежна за цивилната координација во палестинските територии, а меѓународната хуманитарна организација Светска централна кујна (World Central Kitchen-WCK) е задолжена за готвење и дистрибуција на топли оброци.
Од WCK, исто така преку Икс информираа дека помошта што вклучува брашно, тестенини и бебешка формула, ќе им помогне на нивните тимови да работат кон нивната цел за еден милион оброци дневно во Газа.
Хуманитарната помош од 1.200 тони беше испратена во Газа во рамките на кипарската иницијатива „Амалтиа“ – поморски коридор предводен од Република Кипар, поддржан од меѓународни партнери за справување со хуманитарната криза во Газа.
– Помошта, што вклучува прехранбени производи, особено за исхрана на деца, потекнува од Кипар (700 тони) преку организацијата „CyprusAid“ на Министерството за надворешни работи, додека 500 тони се донација од Владата на Малта, како и од меѓународни хуманитарни организации со седиште во САД, Италија, Малта и Кувајт. Во целокупниот напор, клучна е поддршката на Владата на Обединетите Арапски Емирати, соопштија од кипарското МНР на 19 август кога бродот со хуманитарна помош отплови од Лимасол кон Газа.
Кипарската иницијатива „Амалтиа“ за поморски хуманитарен коридор за Газа беше воведена на средината на март минатата година со испраќање бродови со помош од Кипар за Газа, пренесе МИА.
