Семејствата на израелските заложници кои сè уште ги држи Хамас рекоа дека премиерот Бенјамин Нетанјаху е „единствената пречка“ што го спречува нивното враќање и постигнување мировен договор, пренесува Би-би-си.
Форумот за заложници и исчезнати семејства напиша на социјалните медиуми дека нападот на Израел врз Катар минатата недела покажува дека „секој пат кога се приближува договор, Нетанјаху го саботира“.
Нетанјаху во саботата изјави дека елиминирањето на лидерите на Хамас во Катар „ќе ја отстрани главната пречка“ за ослободување на заложниците и завршување на војната.
Тој, исто така, го обвини Хамас дека ги блокира сите обиди за прекин на огнот со цел да се пролонгира војната во Газа. Членовите на Хамас беа во Доха за да разговараат за најновиот предлог на САД за прекин на огнот во Газа.
Сепак, семејствата на заложниците го опишаа одговорот на израелскиот премиер како „најнов изговор за неуспехот да се вратат дома“ нивните најблиски.
„Целната операција во Катар докажа без сомнение дека постои една пречка за враќање на 48-те заложници и завршување на војната: премиерот Нетанјаху“, рекоа тие.
„Дојде време да се стави крај на изговорите наменети за купување време за да може да се држи до власта“.
Групата додаде дека „одложувањето“ на Нетанјаху чинело „животи на 42 заложници и ги загрозува животите на дополнителни заложници кои едвај преживуваат“.
Д. Мишев
