Емануел Макрон и неговата сопруга, Брижит, планираат да презентираат фотографски и научни докази пред американскиот суд за да докажат дека г-ѓа Макрон е жена, пренесува Би-би-си.
Нивниот адвокат вели дека францускиот претседател и г-ѓа Макрон ќе ја презентираат документацијата во тужбата за клевета што ја покренаа против десничарската инфлуенсерка Кандис Овенс, откако таа го промовираше своето верување дека Брижит Макрон е родена како маж.
Адвокатите на г-ѓа Овенс одговорија со барање за отфрлање на тужбата.
Во разговор за подкастот „Fame Under Fire“ на Би-Би-Си, адвокатот на Макрон во случајот, Том Клер, рече дека г-ѓа Макрон ги сметала тврдењата за „неверојатно вознемирувачки“ и дека тие биле „одвлекување на вниманието“ за францускиот претседател.
Во август, Емануел Макрон објасни за француското списание „Paris Match“ зошто одлучиле да поведат судска постапка.
„Ова е за одбрана на мојата чест! Бидејќи ова е бесмислица. Ова е некој што добро знаел дека има лажни информации и дека го сторил тоа со цел да предизвика штета, во служба на идеологија и со воспоставени врски со крајно десничарски лидери.“
Адвокатите на г-ѓа Овенс одговорија на тужбата на Макрон со барање за отфрлање, тврдејќи дека случајот не требало да биде поднесен во Делавер, бидејќи таа вели дека не се однесува на нејзините бизниси, кои се основани во државата. Тие тврдат дека принудувањето да го брани случајот во Делавер би предизвикало „значителни финансиски и оперативни тешкотии“.
Би-Би-Си се обрати до правниот тим на Кандис Овенс за коментар. Таа претходно изјави дека верува оти она што го кажува е вистина и дека нема ништо поамериканско од слободата на говорот и можноста за критикување.
Д. Мишев
