Во текот на изборната кампања, кандидатите за градоначалници ширум државата излегоа со свои визии за развој на општините. Ветувањата варираат – од нови јавни претпријатија за хигиена, градинки и фабрики, до ревизија на урбанистички планови и почит кон приватноста на граѓаните. Еве ги клучните заложби на дел од кандидатите:
Бујар Османи: „Чист Чаир“ за шест дена
Кандидатот на ДУИ, за градоначалник на Чаир, Бујар Османи најави формирање на општинско јавно претпријатие за хигиена „Чист Чаир“ во првите шест дена од мандатот.
Нови 120 вработувања, набавка на цистерни и механизација, поделба на Чаир на реони за поефикасно одржување.
„Ќе го направиме Чаир најчистата општина во Скопје,“ порача Османи.
Горан Герасимовски: Нова градинка во Центар
Актуелниот градоначалник на Центар, Горан Герасимовски најави изградба на современа детска градинка до Клиничкиот центар „Мајка Тереза“.
Капацитет за 100 деца, вработување на 25 воспитувачи и персонал, изградба според стандарди како градинката „Пролет“.
„Создаваме нови можности и за децата и за родителите,“ вели Герасимовски.
Јорго Огненовски: „Битола заслужува искуство“
Кандидатот поддржан од Демократи, Јорго Огненовски, порача дека Битола има потреба од искусен менаџер кој ќе го заживее локалниот економски развој.
Заштита на објекти како хотел „Битола“ и старите училишта, предлог за фабрика за велосипеди, против регионална депонија, за фабрика за преработка на отпад.
„Ќе донесам инвестиции и ќе ја направам Битола самостојна и економски силна,“ рече Огненовски.
Сотир Лукровски: Стоп за бетонизацијата во Карпош
Кандидатот на ВМРО-ДПМНЕ, Сотир Лукровски ветува крај на неконтролираното градење.
Ревизија на сите урбанистички планови, формирање на јавно претпријатие „Карпош план“, гаранција дека зелените површини ќе бидат заштитени.
„Карпошаните заслужуваат хумана урбанизација, не бетонски џунгли,“ порача Лукровски.
Влатко Митовски: Автокоманда – новото срце на Гази Баба
Кандидатот на СДСМ, Влатко Митовски најави трансформација на Автокоманда во современ центар.
Три нови катни гаражи, еднонасочен режим на улиците за помал метеж, нов парк за миленици и уредување на зеленило
„Автокоманда ќе стане гордоста и новото срце на Скопје,“ вели Митовски.
Коалиција за зелена иднина: Кампања без камери во домовите
Коалицијата ДОМ и Зелените најавија поинаква политичка култура.
Нема посети со камери во приватни домови, фокус на јавен дијалог и транспарентност, конкретни мерки за пристапност, зелени коридори и чист воздух
„Домот е интимен простор, не сценографија за политика,“ порачуваат носителите на листите.
Александар Стојкоски: Зелен Ѓорче Петров и пензионерски дом
Кандидатот на ВМРО-ДПМНЕ, Александар Стојкоски истакна две клучни заложби:
Изградба на прв пензионерски дом во општината, расчистување на дивите депонии и намалување на загадувањето, замена на фосилни горива со енергетски ефикасни системи.
„Ѓорче Петров е меѓу најтранспарентните општини и ќе продолжиме во тој правец,“ вели Стојкоски.
Дејан Митески: Аеродром без деца на листа за чекање
Актуелниот градоначалник на Аеродром од ВМРО-ДПМНЕ, Дејан Митески вети фокус на градинките наместо на нови згради.
Новата градинка „Изворче“ со 200 места за деца, нов објект во Лисиче под градинката „Бубамара“, визија за мали, блиски градинки во секое маало.
„Нашата цел е нула деца на листа на чекање,“ истакна Митески.
Ветувањата на кандидатите се разновидни, но граѓаните ќе одлучат кому ќе му ја доверат довербата. Чист воздух, зелени површини, градинки, економски развој и поголема транспарентност – сето тоа звучи убаво на хартија. Прашањето е: кој од нив ќе испорача резултати, а кој ќе остане само на ветувања?
Дехран Муратов
