Национална конференција „Унапредување на механизмите за спречување и заштита од дискриминација на лицата со посебни потреби во Македонија“, денеска се одржа во Скопје, во организација на Фондацијата за одржлив економски развој „Преда Плус“, во соработка со Здружението на студенти и младинци со хендикеп.
Според статистичките податоци, презентирани на денешната конференција, за невработеноста на лицата со посебни потреби во Република Македонија, во 2015 година евидентен е проблемот со нивното ниско образовно ниво, зашто, 54% од лицата со посебни потреби имаат завршено само основно образование, а 20% се со непотполно средно образование!
Ваквата структура на образовни квалификации, во која три четвртини од невработените лица со посебни потреби имаат исклучително низок степен на образование, алармира на итна потреба од преземање на системски мерки за справување со овој проблем.
Благица Димитровска, претседателка на граѓанското здружение „Инклузива“ од Куманово, на конференцијата зборуваше и од своето лично искуство, како мајка на 33-годишен син кој има комбинирани пречки во развојот.
„Досега сè уште не му е одземена деловната способност, затоа што не сакам моето дете да биде прогласено за неважечка личност во оваа држава и сметам дека во некои работи тој е деловно способен. Но, по смртта на родителите, по автоматизам ќе му се одземе деловната способност, за да ја наследи пензијата од родителите инаку нема каде да живее“, изјави Димитровска за ЦИВИЛ Медиа.
Досегашните истражувања на „Инклузива“, покажуваат дека постојат повеќе проблеми во начинот на кој институциите се однесуваат кон лицата со посебни потреби. Димитровска се осврна на раната детекција, немањето регистар на пол, возраст и инвалидитет на лица со хендикеп. Проблем е, според неа, и тоа што има само поддршка за згрижувачките семејства, а не и за биолошкото семејство и дека многу од родителите решаваат своите деца да ги сместат во институции. Според Димитровска, потребни се измени во здравствената заштита на овие лица, бидејќи, човекот ако не е здрав, не може да се вработи, ниту пак, да го издржува своето семејство. Таа е загрижена за тоа што ќе се случи со нејзиниот син по нејзината смрт.
Конференцијата е дел од проектот „Градење капацитети на организации за помош на лицата со посебни потреби во Република Македонија“, што во Македонија се спроведува од ноември 2015 година.
Марија Теговска
