„Украина официјално го доби нацрт-планот од американската страна. Ги посочивме темелните принципи што се од суштинска важност за нашиот народ. Подготвени сме да работиме на неговите одредби на начин што ќе овозможи праведен крај на војната. Во тој контекст, дозволете да истакнам неколку клучни точки“ изјави Кристина Хајовишин, украинска претставничка ОН за т.н. мировен план на САД.
Таа во три точки ги истакна клучните принципи од кои Украина нема да отстапи.
„Прво, Украина е подготвена за сериозни преговори за завршување на војната, вклучително и на највисоко лидерско ниво, но нашите црвени линии се јасни и непоколебливи. Никогаш – ниту формално, ниту неформално – нема да признаеме украинска територија што е привремено окупирана од Руската Федерација како руска. Нашата земја не е на продажба. Украина нема да прифати ограничувања врз своето право на самоодбрана, ниту врз големината и капацитетите на нашите вооружени сили. Исто така, нема да дозволиме никакво нарушување на нашиот суверенитет, вклучително и нашето суверено право да ги избираме сојузите во кои сакаме да се приклучиме. Секој вистински мировен процес мора да го почитува основниот принцип: ништо за Украина без Украина, ништо за Европа без Европа.
Јасно е и дека нема да го наградуваме геноцидниот карактер на руската агресија со поткопување на нашиот идентитет, вклучувајќи го и нашиот јазик.
Второ, поддршката за Украина е незаменлива. Мирот бара сила, безбедност и континуирана финансиска и воена помош. Зајакнувањето на украинските одбранбени капацитети не е ескалација – тоа е единствениот начин да се натера Русија конструктивно да се вклучи во меѓународните мировни напори. Во тој поглед, упатуваме длабока благодарност до сите партнери и сојузници. Оваа поддршка е инвестиција во меѓународниот правен поредок и глобалниот мир.
Трето, кремљовскиот режим нема да запре доколку не биде запрен со решителен и координиран притисок. Постојат само еден реален пат кон окончување на војната: Русија мора да биде принудена да се повлече – економски, политички и воено.“, истакна Хајовишин.
