Руско беспилотно летало (дрон-камиказа) удри и експлодираше во станбена зграда денеска рано изутрина во романскиот град Галац.
Во брза и остра дипломатска реакција, романскиот претседател Никушор Дан, по итно свиканиот состанок на Врховниот совет за национална одбрана, објави дека генералниот конзул на Руската Федерација во Констанца е прогласен за непожелна личност (persona non grata) и дека оваа руска дипломатска мисија ќе биде целосно затворена.
Според официјалното соопштение на романското Министерство за национална одбрана, специјализирани тимови од Министерството за одбрана, Министерството за внатрешни работи и Романската разузнавачка служба се на терен и го истражуваат местото на настанот.
„Првичните информации укажуваат дека целиот товар на дронот ‘Геран 2’, со руско потекло, експлодирал при ударот“, потврдија од Министерството за одбрана.
Во нападот се повредени две лица, кои итно биле пренесени во Окружната клиничка болница во Галац. Експлозијата го урнала покривот на станбениот комплекс, предизвикувајќи сериозна материјална штета.
Префектурата на округот Галац соопшти сите жители чии домови се оштетени ќе бидат привремено сместени во објекти обезбедени од градската власт, додека Државниот инспекторат за градежништво врши итна техничка експертиза за да утврди дали се потребни дополнителни мерки за консолидација на зградата.
Претседателот Никушор Дан ја префрли целата одговорност директно на Москва, откривајќи дека романските одбранбени системи успешно ја следеле патеката на военото летало.
„Целата одговорност за овој инцидент е на Русија, земја која повеќе од четири години води агресивна војна против Украина. Имавме руски дрон ‘Геран-2’ кој полета од Русија, ја знаеме траекторијата, знаеме каде помина низ Украина, знаеме каде влезе во Романија. Тој беше дел од рој од 43 руски беспилотни летала, од кои само едно стигна до романска територија“, изјави претседателот Дан.
Претседателот Дан упати остри критики и до домашните политички актери кои се обидоа да ја оправдаат Москва.
„Сакам да ја истакнам неодговорноста на некои романски политички лидери и креатори на јавно мислење кои се обидуваат да ја оправдаат Русија за овој инцидент. Сега романските граѓани можат јасно да видат кој е прозападен, а кој само глуми прозападна ориентација“, додаде Дан.
Овој инцидент претставува еден од најсериозните директни удари на територијата на земја-членка на НАТО од почетокот на војната. Романското Министерство за национална одбрана најостро ги осуди, како што ги нарече, „неодговорните акции“ на Руската Федерација, предупредувајќи дека овој напад ги надминува рамките на регионална закана.
„Ваквите инциденти го демонстрираат недостигот на почит од страна на Руската Федерација кон нормите на меѓународното право и ги загрозуваат не само безбедноста на романските граѓани, туку и колективната безбедност на НАТО“, се вели во соопштението на Министерството за одбрана, каде се нагласува дека ова претставува „нов предизвик за регионалната безбедност и стабилност во областа на Црното Море“.
Министерството апелираше до граѓаните во регионот строго да ги следат препораките на властите и да се потпираат исклучиво на официјалните информации пренесени преку институционалните канали, додека истрагата продолжува.
Џ. Дерала / Д. Мишев
