Најмалку 16 лица загинаа, а 69 се повредени во руските напади врз Украина во претходното деноноќие. Меѓу жртвите се и деца. Нападите продолжија и во текот на денот, со погодени медицински објекти во Кијив и нови штети врз енергетската инфраструктура. Билансот не е конечен.
19 октомври: Шест загинати во напад врз парк
Руски дрон погоди парк во Нова Водолага, во Харкивската област, убивајќи шест лица, меѓу нив две деца. Едногодишната Ангелина загинала во својата количка, а нејзината мајка подоцна починала во болница.
Претседателот Володимир Зеленски го осуди нападот и повика на засилување на украинската противвоздушна одбрана и јасно се спротивстави на отстапките и олеснувањето на санкциите кон Русија.
Во вечерниот напад врз магацин во Обухивскиот округ, во Кијивската област, загинаа уште три лица, а шест беа повредени.
20 октомври: Загинати на автопат, погодени болници
Утрото на 20 октомври, руски дрон погоди во близина на автопатот Кијив–Одеса. Според регионалното обвинителство, загинаа три лица, а четири се повредени. Во нападот се запалија повеќе автомобили.
Во текот на денот беа погодени и медицински објекти во Кијив. Во Соломјанскиот реон беше оштетен горниот дел на здравствена установа, без пријавени повредени. Во Холосиивскиот реон, каде што се наоѓа Националниот институт за рак, паднати остатоци оштетија болнички објект. Според ажурираниот извештај на градската воена администрација, повредени се три лица.
165 дронови и нови удари врз енергетиката
Според Воздухопловните сили на Украина, од вечерта на 19 октомври Русија употребила 165 беспилотни летала, меѓу кои 105 Шахед дронови со млазен погон. До 8 часот наутро по локално време, биле соборени или потиснати 115 летала. Регистрирани се погодоци на 30 локации и паднати остатоци на уште 13.
Енергетски објекти биле нападнати во седум области. Во Тернопилската област се погодени три енергетски објекти, а во Одеската област три објекти на ДТЕК. Нападите предизвикаа прекини во снабдувањето и итни поправки.
Дир ја пренесе пораката на Сибига: Следниот руски дрон да биде потежок за производство
Украинската амбасадорка во Северна Македонија, Лариса Дир, во објава на X ја пренесе пораката на министерот за надворешни работи Андриј Сибига:
„Најефективниот одговор на руското злосторство е да се направи следниот руски дрон потежок за производство, потежок за лансирање и полесен за уништување од страна на украинските бранители.“
Министерот за надворешни работи на Украина Андриј Сибига: Најефективниот одговор на руското злосторство е да се направи следниот руски дрон потежок за производство, потежок за лансирање и полесен за уништување од страна на украинските бранители. https://t.co/gO3KR83wmZ
— Larysa Dir (@dir_larysa) October 20, 2026
Во споделениот инфографик се наведуваат 19.146 загинати и 54.231 повреден цивил, меѓу нив 749 загинати и 2.930 повредени деца, како и 388.952 уништени или оштетени цивилни инфраструктурни објекти.
Овие бројки претставуваат кумулативен биланс прикажан во графиката, а не жртви од последното деноноќие. Во неа не се наведени датумот на пресек и методологијата.
ЦМ Деск
