Денеска во Елбасан, Албанија, се одржува централен настан по повод Меѓународниот ден на балканските Египќани, така што на едно место ќе се соберат балканските Египќани од Македонија, Албанија, Црна Гора, Србија и Косово, во заедничко споделување на културните вредности и заложби. А, утре во Охрид, ќе се одржи годинешното одбележување на Меѓународниот ден на балканските Египќани (24 јуни) во Македонија.
Во домот на културата „Глигор Прличев“ точно напладне ќе биде промовиран документарен филм за животот, културата, културното наследство и движењето за заштита на идентитетот на балканските Египќани во продукција на ТВ Ал Џезеира. На агендата е и богата културно-музичка програма.
Организаторите на настанот „Заедницата на балканските Египќани во Македонија“ и ресенското здружение „Изида 41/21“, кои што ги застапуваат правата на заедницата на Египќаните, го поканија и министерот за култура Роберт Алаѓозовски, да биде дел од чествувањето, за да даде поддршка за долгогодишната борба за подобар живот, препознавање и признавање на балканските Египќани во Македонија.
„На вториот конгрес на Сојузот на балканските Египќани, одржан во 2010-та година во Струга, донесена е одлука 24-ти јуни да се одбележува како Меѓународен ден на балканските Египќани. На овој ден, во 1990 година во Охрид е одржано првото Собрание на една општествено-политичка организација на Балканот, која се заложи за сочувување на етничкиот идентитет и заштитата на правата на оваа заедница“, објасни Зизо Љамковски, од здружението „Изида“, кој во интервјуто за ЦИВИЛ Медиа, ги истакна токму напорите на Егишчаните за подобрување на социјалниот и политичкиот статус во заштитата на нивните права, како граѓани во Македонија, и за излез од маргините на општеството.
Според организаторите, единствените застапници на правата на Египќаните во Македонија се граѓанските организации коишто повеќе од 20 години посветено работат на промовирање на културните вредности на заедницата и на обединување на младите Египќани од Охрид, Струга, Ресен, Кичево, Дебар, Струмица и другите делови на Македонија, преку неформално образование, личен развој, учество во јавниот живот и процесите на донесување на одлуки.