Откако вчера Апелациониот суд за првпат прифати некоја од жалбите на Специјалното јавно обвинителство во кои се бара притвор за дел од обвинетите во процесите кои ги води ова обвинителство, Кривичниот совет и денеска, на јавни седници. ќе одлучува по жалбите на обвинетите лица и на СЈО за решенијата на понискиот суд.
Апелациониот суд денеска ќе одлучува по жалбите на СЈО и на обвинетите во случаите „Тендери“ (за Музејот на ВМРО, во кој е првоосомничена поранешната министерката за култура Елизабета Канческа-Милевска) и „Топлик“ (продажба на градежна парцела за изградба на елитната населба Сончев град).
Апелациониот суд вчера ја преиначи одлуката на понискиот суд за одземање на патните исправи и донесе одлуки за притворање на ексначалникот на Петтата управа во МВР, Горан Грујовски, на поранешниот шеф на кабинетот на Сашо Мијалков, Тони Јакимовски и на Никола Бошковски, вработен во Управата за безбедност. Мерката за тројцата обвинети во случаите „Таргет“ и „Тврдина“, за уништување на опремата за прислушување во МВР, ќе биде извршена по правосилноста на решението, односно, откако ќе го примат решението, Грујовски, Јакимовски и Бошковски имаат право на жалба до Врховниот суд, што го пролонгира нивното спроведување во притвор.
Координаторот на пратеничката група на ДУИ, Ејуп Алими, останува само без пасош, а потврдена е истата одлука и за поранешниот челник на УБК, Сашо Мијалков. Апелациониот суд не ги прифати ни жалбите на СЈО за вицепремиерот Владимир Пешевски и за новинарот Драган Павловиќ-Латас, на кои исто така, им се одземени само пасошите.
