Серијалот од шест стории, посветен на скандалот со бебињата на Клиниката за гинекологија, чиј автор е новинарката Ирена Мулачка од неделникот „Фокус“, ја доби првата награда за најдобра новинарска сторија, на конкурсот што за најдобрите новинарски трудови од областа на општествено-социјалниот живот, го објави Советот за етика во медиумите во Македонија (СЕММ).
Наградите кои оваа година за првпат ги доделува СЕММ, се доделуваат со финансиска поддршка од Европската унија и УНЕСКО, во рамки на проектот „Градење доверба во медиумите во ЈИЕ и Турција“.
Прилогот за самохрана мајка со наслов „Семејна трагедија ја остави без парче леб Гордана Славковиќ“ објавен во емисијата „360 степени“ на ТВ Алсат, чиј автор е новинарот Никола Здравковиќ, ја доби втората награда, а третонаградени се сториите на новинарите – Мирјана Мирчевска-Јовановиќ, за серијалот прилози за малиот Иван и неговата баба, емитуван на ТВ Канал 5 и на Марјан Николовски за приказната со наслов „Можат ли верските заедници да ги тргнат сите бариери за непречена молитва“, објавен во емисијата „На иста страна“ на ТВ Сител.
Оценувачката комисија во состав Жанета Трајковска, Бардуљ Заими и Зоран Иванов, одлучи да додели и пофалници: на Зоран Јовановски за ТВ сторијата „Да прогледаат тие што треба да видат“ објавен во емисијата „360 степени“ на ТВ Алсат и Маја Раванска за прилогот „Македонскиот Стивен Хокинг задушен во стегите на неинклузивно општество“, објавен во списанието „Лице в лице“.
Според жири-комисијата, на годинешниот конкурс биле пријавени повеќе новинарски приказни, што адресираат теми од јавен интерес, кои ја разбранувале јавноста и поттикнале решенија за одредени општествени проблеми.
Новинарите со наградени стории порачаа дека институциите да ги решаат проблемите на граѓаните од ранливите категории, пред да бидат објавувани прилози, што иницираат нивна реакција.
Извршната директорка, Марина Тунева рече дека СЕММ се залага конкурсот да прерасне во традиционален, со цел да се поддржи професионалното и етичко новинарство.
