Со години служеа и сѐ уште им служат на осомничени за тешки дела. Некои од нив подлегнаа на сончоглед ефектот, како што веќе пишувавме неколкумина на овој простор, а некои останаа директни пропагандни бранители на режимот. Дел од нив добија странски пари, дека немаа сиротите, за да ги препарираат своите програми и да станат божем професионални и непристрасни.
Што добивме? Добивме лигави медиумски проекти кои сега се додворуваат на новата влада. И ги гледаме како, со доза на лошо одглумено покајание, покажуваат волја за професионализирање. Еднаш владини, секогаш владини… Пустото, им зрачи од лицата контаминирани од долгогодишното ползење и бацување чизми. Препарирањето го прават преку „проекти“. Демек, немаат тие врска со валканиот бизнис на телевизиите во минатото, тие само водат продукциски бизнис кој само се емитува на тие телевизии. Независни се тие!
Одбив покана од една телевизија да гостувам во емисија. Бев на граница да прифатам, бидејќи сакам да негувам пристапност и отвореност кон сите медиуми подеднакво. Сепак, по кратка консултација со мои блиски, надвладеа негативниот одговор. И многу сум среќен поради таа одлука.
Во разговорот со авторот на емисијата, по одбивањето, падна и нељубезно обвинение на моја адреса – сум ги изневерил принципите за кои сум се борел десет години. Логиката е обратна. Нема што тие да обвинуваат дека некој ги изневерува принципите, туку тие згазија на сѐ што може да се нарече човечко и професионално достоинство. Сепак, во разговорот се задржав скромно на ставот дека во случајов не се работи за медиум кој ме кани, туку за обично партиско гласило, што значи дека не одбивам медиуми, туку проекти на структури кои нанесоа и сѐ уште нанесуваат големо зло.
Кога беше најгрдо, им одев, ете, со пуста надеж дека тоа придонесува кон каков-таков облик на дијалог во јавноста. Како возвратија? Нѐ искористија како алиби дека божем се отворени кон различното мислење. И продолжија со уште црни кампањи против слободната мисла. Со грди навреди и наведување на јавен линч, нарачуваа убиства јавно, на телевизии со национални концесии. И гледам – се извлекуваат и тоа на голема врата, повторно со убави хонорари. Е, не од мене! Нека ги амнестира кој сака, јас немам таква намера. Во име на чесните и свесните луѓе.
Немам намера да им служам како алиби за божемното демократизирање и професионализирање! Знам дека првата прилика ќе ја искористат да го злоупотребат тоа. Немам намера да си го губам времето со соработници, партнери и слуги на фашисти и криминалци!
објавено во Плусинфо и Слободен печат (27/10/2017)