Најмалку пет нови пратеници во Собранието, по првиот круг од локалните избори. Конечниот број на нови пратеници кој може да достигне и до 11, сепак, ќе се знае по завршувањето на вториот круг од изборите.
На местото на досегашните пет пратеници кои станаа градоначалници, ќе влезат три жени со што ќе се зголеми и бројот на пратенички во актуелниот состав на парламентот.
Петре Шилегов од СДСМ, кој стана градоначалник на Град Скопје, во Собранието ќе го замени Татјана Лалчевска, која беше четврта на листата од Првата изборна единица.
Новиот градоначалник на Општина Карпош, Стефан Богоев од СДСМ, во Собранието ќе го замени Анета Симеска Димоска.
На пратеничкото место на Максим Димитриевски од СДСМ, кој стана градоначалник на Куманово ќе влезе неговата сограѓанка Лидија Тасевска.
По изборните резултатите од првиот круг, Собранието ќе добие двајца нови пратеници и од Четвртата изборна единица. На местото на Сашо Поцков, кој беше избран за градоначалник на Гевгелија, седнува Ристе Ташев од Неготино, додека на местото на Коста Јаневски, новиот градоначалник на Струмица, ќе влезе Костадин Костадинов, кој досега раководеше со Општината.
Сепак, зависно од резултатите од вториот круг на изборите, постојат шанси во составот на Собранието да влезат уште шест нови лица.
Во трката се актуелните пратеници, Курто Дудуш, Благој Бочварски и Бетиане Китев од СДСМ, Јохан Тарчуловски од ВМРО-ДПМНЕ, како и Зијадин Села од Алијансата за Албанците и Зеќирија Ибрахими од Беса.
Престанокот на мандатите на новите градоначалници што победија во првиот круг ќе мора да почека до завршувањето на вториот круг.
Согласно процедурата, претседателот на Собранието, Талат Џафери е должен да побара список со резултати од Државната изборна комисија, за тоа кои пратеници станале градоначалници и да свика седница, на која ќе се верификуваат мандатите на новите членови на парламентот.
Пред почетокот на локалните избори, пратениците Бардиљ Даути од ДПА и Билал Касами од Беса, и двајцата кандидати за градоначалник на Тетово, поднесоа оставки од функциите. На нивно место, според процедурата, ќе дојдат нови пратеници од овие партии.
М. И.
