Божана Ќулавкова, новинарка во интервју за ЦИВИЛ Медиа зборува за слободата на изразување, медиумските слободи, комерцијализацијата на медиумите и притисоците од бизнис центрите на моќ.
ЦИВИЛ Медиа: Што за вас претставува слободата на изразување, медиумските слободи и активизмот?
Ќулавкова: Слободата за новинарите значи она што го гледаме да го презентираме во јавноста. Значи во еден настан, една вест која ја презентираме треба да застапиме пет страни отприлика за да можеме да ја презентираме објективната страна на настаните којшто се случуваат. Но, тоа во локални услови, како што е тука во Велес, не би можело тоа да се прави бидејќи тука не се практикува земање изјави на луѓе коишто се експерти по одредена област, бидејќи на некој начин тие се повлекуваат или се плашат да дадат изјави.
ЦИВИЛ Медиа: На кој начин ја поддржувате или можете да ја поддржите слободата на изразување и медиумските слободи воопшто?
Ќулавкова: На кој начин? Па, скоро 35 години сум во оваа бранша и со транзицијата на општеството и јас како личност и како новинар се променив, бидејќи условите во коишто сите овие години работиме не ни дава толкава слобода да работиме, иако амбициозно почнавме со желбата да информираме онака како што е. Но, често пати наидувавме на камен на сопнување и репресии од луѓето коишто беа на власт, па така и од стопанствениците коишто не сакаа да се пишува, особено во времето кога се приватизираа фирмите, па тогаш бевме сведоци на најразлични корупции и криминални дејствија. Мислам дека во општествените информативни членства многу пообјективно можеше да се пишува, отколку во приватните. Бидејќи приватните медиуми се на некој начин зависни од капиталот во државата, во градот, и на тој начин стануваме малку поблаги. Значи јас од еден остар новинар станав еден комерцијален новинар, затоа што морав да ја продавам програмата за да можам да останам во браншата којашто ја сакам и да го работам тоа што го сакам. Тешко е да си новинар денеска, но се што се сака не е тешко, така што секогаш ќе се залагам за слобода на информирање. Тоа не значи дека можеш да го кажеш само со збор, можеш и со песна или преку некој напишан текст пак да им доловиш, на слушателите и конзуматорите што си сакала да кажеш.
ЦИВИЛ Медиа: Кои се вашите препораки во однос на борбата за слободни медиуми?
Ќулавкова: Моите препораки се медиумите да се остават на страна, најнапред од политиката. Бидејќи сите овие години наназад медиумите беа некои жигосувани, а некои фаворизирани. Треба да работат според својот кодекс и етика. Значи, новинарите да бидат навистина тоа што се. Меѓутоа мислам дека есапот ни го буни фејсбук како социјална мрежа, или порталите бидејќи не се никако регулирани. Мислам дека треба со закон да бидат регулирани и тогаш јавниот пишан збор ќе биде на санкции. Бидејќи сега секој е новинар, секој кажува мислење. Да, и тоа е слобода, но и слободата има граници. Дното го постигнавме време е да се дигнеме нагоре!
Маја Ивановска
Камера: Дехран Муратов
Монтажа: Ермин Климента
Фотографија: Биљана Јордановска