Претседателот Иванов во своето годишно, педесетминутно, обраќање во Собранието, како законска и уставна обврска, реши да се фокусира на сите оние работи што вршат ерозија во институциите и штетно влијаат на јавното мислење, а и кон продлабочување наместо решавање на внатрешната, државна, криза.
Лажните вести и информации, загадениот медиумски и јавен простор, беа први на списокот, од долгата листа на Иванов, на предизвикувачи на одржлива и продлабочена политичка криза.
Претседателот истакна дека медиумите, интернетот и социјалните мрежи, се основата за тензии и конфликт меѓу граѓаните.
„На Македонија и е потребно слободно, независно и професионално новинарство, а не медиуми кои функционираат како експонати на политичките партии и пласираат лажни вести“, истакна Иванов.
Негодувања кај дел од пратениците предизвика изјавата дека барањата на „оние кои повеќе од два месеца на мирен и достоинствен начин искажуваа грижа за државните интереси…“, мислејќи на протестите на ВМРО –ДПМНЕ за судските процеси поврзани си 27 април, се и негови барања.
Парламентарниот дом и новата Влада беа критикувани скоро во секоја од проблематичните точки за кои зборуваше Иванов.
Реформи, загаден воздух, судство, криминал, клиентелизам и корупција, лична одмазда, партиски и политички реваншизам, ингеренциите на УБК, системски реформи во безбедноста, влез во ЕУ и НАТО се само дел од низата на проблеми за кои претседателот посочувал, но нема кој да ги спроведе.
На листата критики се добрососедските односи на новата Влада. Претседателот разочарано посочи на лошото влијание на Тиранската реформа, котнра-разузнавачка измама во односите со Србија, како и финансиската помош на Владата на Косово на ангажираните во нападите во Гошинце и Куманово.
Добар дел од обраќањето беше посветено и на Законот за јазици кој смета дека е репресивен и дека претставува опасност за унитарноста на државата.
Не беше поштедена ниту македонската дипломатија со надеж за поголем професионализам кај македонските амбасадори.
Цитирајќи ги Албер Ками, Мила Кундера, Блес Паскал и на крај повикувајќи се на Крсте Петков Мисирков низ својот говор, Иванов за крај заклучи дека државата, која треба да не држи заедно се поткопува заради „дневно-политички агенди, мобилизирање на гласачи, освојување и задржување на власта“.
Иванов порача да се врати политичкиот дијалог за доброто на државата и да се зајакне патриотизмот, отвореноста на умот, креативноста и иновативноста.
Тој посочи да не се мисли на изборите туку на граѓаните, затоа што нивните барања се негова и обврска на Владата и пратениците.
По неговото обраќање, со свои пофалби и критики на прес-конференции се огласија ВМРО-ДПМНЕ и СДСМ.
Биљана Јордановска
